Shillong, Jylliew 05: Kum shibynta na ka jingrakhe ia ka World Environment Day, ka Mawlai Town Dorbar kala mih sahkhmat ban pynlong ia ka jingpynkhuid Shnong ia ka Wah Umsning bad Umsohlang hynne ka sngi Nyngkong nalor ka jingthung dieng ha Lum Mawpat.
Ki Shnong bapher bapher ka Mawlai Pyllun kiba ka Wah Umshing ka iaid lyngba, kila iamih paidbah ban iapynkhuid ia kane ka Wah hala ki jong ki Shnong da ka thong ba kumjuh kata ban wanrah ia ka jingkhuid biang ha kine ki wah bad ka lawei kaba jyrngam.
Ki Shnong kiba la iamih paidbah ki kynthup naduh na Mawlai Kynton Massar, Nongpathaw, Umjaiur, Syllaikariah, Mawlai Nongkwar, Mawlai Mawiong haduh Mawlai Mawiongrim.
U Secretary ka Mawlai Town Dorbar Marco Mitri haba iakren bad ki nongthoh khubor ula ong ba ka sienjam bala shim ban pynkhuid ia kine ki artylli ki Wah ha Mawlai ka dei namar kine ki wah ki dei ki tyllung um jong ka Water Supply Scheme ban sam umbam umduh sha ki shnong bapher bapher ka Mawlai.
U Bah Marco ula pyntip ba ka Shnong Kynton Massar ha kine ki san snem bala leit noh, kala shimkhia bha ban iada ia ka Umshing Umsohlang kaba bsa um ia ka shnong Mawlai baroh kawei.
U Bah Marco ula pyntip ruh ba ka Mawlai Town Dorbar kala buh ia ka hoarding kaba heh bha naduh Mawlai Petrol Pump haduh NEHU ban pyntip sha ki paidbah ba ka Umshing Umsohlang ka dei ka tyllong um jong ka shnong Mawlai.
Ha kane ka sngi, ka Meghalaya State Pollution Control Board ruh ha ryngkat ki Dorbar Shnong ka Nongbah Shillong kila pynlong ia ka jingpynkhuid ia ka Wahumkhrah ha ki thain Urkaliar ban rakhe ia kane ka sngi pynneh mariang.
Ki Volunteer n aka Dorbar Shnong Demseiniong, Pynthor, Nongmensong bad Urkaliar kila iashimbynta ban iapynkhuid ia kane ka Wah bad ki jaka ba marjan.
Kum ia kane kajuh ka prokram la pynlong ruh ha Demthring, Nongrim Hills, Umpling bad Rilbong.
