Shillong, Risaw 26 : Ha ka jingiakhun pyrshah ia ki kam dawa pisa jubor jong ki riew runar hapoh ka Jylla, ka Tnad Pulit ka East Khasi Hills hynne ka sngi Palei, kala ioh ban kem ia ka kynhun ki Nongdawa pisa ha Nongbah Shillong, kiba pyndonkam ia ka kyrteng jong ki hynriew tylli ki sengbhalang ki bym ju bna mynno mynno ruh.
Kine ki Seng dawa pisa ki dei kiba kyrteng ka Hynniewtrep People Defence Alliance (HPDA), ka United Khasi Movement (UKM), ka Federation of Khasi United People (FKUP), ka Confederation of Meghalaya People (CMP), ka Khun Hynniewtrep Youth Council (KHYC) bad ka Hynniewtrep Youth Region (HYR).
Halor ka jingioh khubor ia ka jingdon ki kam dawa pisa ha ki jaka iew ha Police Bazaar bad Iewduh, ka Kynhun Special Cell ka East Khasi Hills kala pynlong ia ka jingapshrip la bun sngi ha kine ki jaka iew bad hynne ka sngi, kila ioh kem ia 4 ngut ki briew na Police Bazaar katba ki dang sam shithi dawa pisa sha kawei ka dukan.
“Halor kane, la register da ka Suo-Moto case pyrshah ia kine ki 4 ngut ki briew ha Sadar Police Station halor ki kam dawa pisa” pyntip u Bah Vivek Syiem, Superintendent of Police (City) ka East Khasi Hills.
Na kine ki briew, ki Pulit kila ioh ruh ban kurup ia bun ki shithi dawa pisa jubor.
Kine ki shithi dawa pisa ki kynthup :
1. Lai tylli ki shithi dawa pisa na ka seng Hynniewtrep People Defense Alliance (HPDA).
2. Lai tylli ki receipt book jong ka Hynniewtrep People Defense Alliance (HPDA).
3. Artylli ki donation receipt slip jong ka United Khasi Movement (UKM).
4. Artylli ki donation slip jong ka Federation of Khasi United People (FKUP).
5. Artylli ki donation slip jong ka Confederation of Meghalaya People (CMP).
6. Kawei ka counterfoil slip jong ka Khun Hynniewtrep Youth Council (KHYC).
7. Artylli ki donation slip ka Hynniewtrep Youth Regions (HYR).
8. Kawei ka Scooty Aprilla ML05 Q 9828.
9. Saw tylli ki mobile phone.
U Bah Vivek u pyntip ba ka jingtohkit ka dang iaid shakhmat ban pynthikna ia ki dukan kiba la dep sam ia ki shithi dawa pisa khnang ban lah register kham bun ki case pyrshah ia kine ki runar bad ruh ban kem ia kiwei kiwei ki briew/kynhun kiba donkti ha kane ka kam dawa pisa jubor hapoh ka Nongbah.
“Katto katne na kine ki briew ki dei ruh kiba la don dak kam bymman bad la ju shah kem teng” ula ong haba kyntu ia ki paidbah bad ki nongkhaii ba kin ai jingtip sha ki Pulit khnang ba kin lah ban ioh kem ia kine ki nongdawa pisa bad ban pynngat ia ki ha ki kyndon ka ain.
