Hap siew khajna T.30,000 ki pickup, T.90,000 ki trok ban rung sha Jylla
Shillong, K’lyngkot 15 : Ka Seng Ri-Bhoi Youth Welfare Organisation (RBYWO) kala sei pyrthei ia ka jingmih jong ka kompani M/s Double Seven Corporation, kaba kynnoh lum khajna be-ain na ki kali kit syiar ha surok 4-lane ka Them Ri-Bhoi.
Kat kum ka jingong kane ka seng, kane ka kompani ka lum khajna da kaba pynrung (entry) ia ki kali kit syiar sha Jylla, kaba long T.30,000 ia ki Mahindra pickup bad T.90,000 ia ki ka trok kit syiar.
Kane ka Seng kala tohkit ruh ban shem ba kine ki kali kit syiar ki hap ban siew ia ka bai rung ki kali da kaba pynthep ia ka pisa ha ka google pay ne Gpay ha ka Account ka M/s Double Seven Corporation AC: 59208413927554 bad lyngba u IFSC: HDFC0001643, uba dei u IFSC code ba na Itanagar.
U President ka RBYWO Bah Ban Kharnaior u iathuh ba ka Seng kala leit ban ujor ia ka jingdon jong kane ka kompani sha u Myntri ka Tnad Veterinary Bah A.L.Hek hynrei la kam ba u Myntri ula pynpaw ia ka jingbym don jingtip satia ia kane ka kam.
U iathuh ba hadien kane ka jingujor, ki briew ba pyniaid ia kane ka M/sDouble Seven Corporation, la kynnoh kila phah siew mynta ia ka khajna da ka pisa ne lyngba ka gpay sha u President ki Meghalaya Paultry Association Bah Wanshai Kharshandi bad sha u Vice President Shanlang Mukhim.
Ka RBYWO kala phah mynta da ka dorkhas sha u Myntri ba pan jingshai ia ka jingmih jong kane ka kompani bad ka jingphah siew khajna sha ki Nongialam ka seng ki Nongdie Doh Syiar nalor ka jingtip kaba bniah ba shano kane ka pisa ba lum khajna-T.30,000 bad T.90,000 ka poi namar ka Bank Account bap hah siew ka dei kaba na Itanagar, Arunachal Pradesh.
“Lada ka jylla ka ioh khajna hok sha ka pla ka Sorkar ngim da sngewpyrshah eh, hynrei ba kan leit sha ka pla jongno jongno ngim lah ban pdiang bad lada ka jingkhrong Khajna sorkar ka long ha kane ka rukom ka pyni ba ka don ka High Level team kaba bamsap bad pyniaid shibun ki kam beain hapoh ka Jylla jongngi” ula ong.
U Bah Ban u pyntip ba ka Seng kan ap ia ka jingpynshai na ka Sorkar la ka long lashai ne lashisngi bad ong “Lada ngim ioh jingpynshai, ngin ujor noh da ka ejahar (FIR) sha ki bor ka Ain”.
“Ngi la dep iakren bad ki nongiasaid ain jong ngi ba kumno ngin pyniaid ia kane ka kam shakhmat” ula bynrap.
