Shillong,Rymphang 27: Kawei ka longkmie kaba la tip kyrteng kum ka Kong Rejoice Indalin Rynjah, kala pynpaw iaka jingbitar ba ha ka por ba ka leit ban thep vote namar ka jingshem ba ia ka hok jong ka la pyndonkam bakla da kiwei pat ki briew kaba ki ong ha ka ktien nongwei ka proxy.
Kane ka longkmie kala shem ia kane hadien ba kala leit sha ka jaka thep vote ha Lawjynriew, Nongthymmai ban shem ba ia ka vote jong ka, la don ba pyndep da kiwei pat ki briew.
Ka kong Rejoice kala ong, ba ki bor pyniaid iaka elekshon kim shym la shah shuh iaka ban thep vote hynrei ka la iengskhem haka nongrim ba kam pat wan ban thep iaka Vote bad hadien ba la dep ban pynkut noh iaka jingthep vote, ki bor pyniaid elekshon kila phah iaka Kong Rejoice ban thep noh iaka Vote da Ballot Paper.
Halor kane ka jingjia, u Deputy Commissioner ka East Khasi Hills u SC Sadhu uba long ruh u District Election Officer (DEO) ula ong ba mar ia ioh jingtip halor kane ka jingjia, kila weng noh ia ka kynhun baroh kaba la pyniaid ia kane ka jingthep vote bad la buh noh da kiwei pat bad la ai jingbthah syndon ia baroh ba ki dei ban da peit bniah ia ki kot ki sla jong ki nongthep vote hashwa ba kin ioh thep ia ka vote ka jongki.
“Ngin phah tohkit halor katei ka jingjia ha ka Lawjynriew Polling Station bad katei ka jaka thep Vote kadei ruh ka jaka thep vote kaba leh iaka Web Casting bad hadien ba kila dep ban bishar bniah iaka Video. Ngin sa tip shai kdar kaei kaba jia bad yn sa shim da ki sienjam kiba tyngeh katkum ki kyndon ain” la pynkut u DC.
Ha kaba iadei bad ka jingkynnoh bad kawei ka nongialam jongka seng BJP kala sam pisa ia ki nongthep Vote ha Oakland, kabahap ha North Shillong Constituency, u SC Sadhu ula ong, ba ula leit jurip hi dalade ia kane ka jaka thep vote bad ula phah iaka kynhun jong ki Pulit bad ki Flying Squad hynrei katkum ka kaiphod bad ki jingtip kiba la ioh, ka paw ba kam shim la don satia kano kano ka jingsam pisa hynrei kala don tang ka jingialum paidbah hynrei la phah noh iaki ba kin iapra noh na katei ka jaka ym ban ialum paidbah.
