Byrthen tyngeh ka RBCU ban iakhih lada ym bteng ia ka jingtei
Nongpoh, Naiwieng 08: Ka jingtei jong ka Auditorium ka Ri-Bhoi College kala pynsuba mynta ba lehse ka lah ban don ka kam bamsap ba kot da ki klur tyngka namar ka jingbym lah ban trei pyndep ia kane ka jingtei kaba la bei tyngka da ka North Eastern Council (NEC) naduh u snem 2012.
Kane ka jingsuba kala pynbor ruh ia u Myntri ka Tnad Pule Puthi ka Jylla ma Lahkmen Rymbui ban leit jurip hi dalade ia kane ka jingtei hynne ka sngi Ba-ar bad ula bthah ia ki bor pyniaid jong ka College ba kin buddien bad ban kynruh ruh ia ki bor pyniaid District ban pan ia ki jingtip.
Na ki jingioh jingtip na ki Nonghikai bad ki samla pule, la ong ba kynnoh ba ka jingtei ia ka Auditorium ka dei kaba la ieh shrah mynta la palat shiphew snem watla ia ka pisa kaba kot da ki klur tyngka, la dep ban pynmang bad bei da ka North Eastern Council (NEC).
Ha ka jingjurip Ka Shlem la lap ba ka jingtrei ka dang long tang ia ka jingpynieng paia, ker kynroh ba 3-4 phut bad ka jingsiang ia ka madan nalor ki mynkyndon ban rung shapoh kane ka Autditorium hynrei ia kiwei kiwei la shu buh buhteng khlem da pyntrei shuh.
La pyntip ba ka North Eastern Council kala bei pisa haduh T. 5 klur ban tei ia kane ka Auditorium jong ka Ri-Bhoi College kaba la sop mynta da ki niut ki nier.
Ha ka jingjurip jong u Myntri ka Tnad Pule Puthi, la iadonlang ruh u Principal ka College Bah SSR Bamon, ki Nonghikai, u Additional Deputy Commissioner Bah R Kharbihkhiew, u President ka Ri-Bhoi College Students Union samla Jason Lennox Nongrum bad kiwei kiwei.
Haba kren bad ki nongthoh khubor, u Myntri ula pynpaw ba watla um shim don jingtip eiei halor kane ka jingtei kaba la sahteng palat phew snem haba pynpaw ruh ia ka jingkyndit ban iohi ia ka jinglong jingman jong ka. U Myntri ula bthah ia ki bor College ba kin buddien ia kane ka kam bad ki bor pyniaid jong ka District.
“Nga ai jingmut ruh ia ki bor ka College ba kin leit iakynduh ia u MLA ka thain bad ruh ia u Deputy Commissioner, ban pan jingiarap song pisa lyngba ka skhim kyrpang bala tip kum ka DMF khnang ba ka Ophis u DC kan lah ban pynioh ha kaban lah pyndep noh ia kane ka jingtei” ula ong.
U President ka Ri-bhoi College Students Union samla Jason Lennox Nongrum, u la pynpaw ia ka jingsngewkhia kaba khraw halor ka jingbym lah ban pyndep lut ia kane ka jingtei kaba la mang na ka bynta ka jingdonkam jong ki samla pule kane ka kolej bad wat ia ka district hi baroh kawei.
U la ong ruh “Ka Union ka kren da kaba shai ba kam kwah ba ka jingmyntoi jong ki khynnah pule yn leh politics da mano re mano, kane ka dei ka hok jong ki samla pule kumno haduh mynta ngi dang hap ban dawa?” ula ong haba pyntip ban a ka liang ka Union ka la dep ban rai ba lada ym lah ban sdang biang ia kane ka kam, ka union kam banse wat ban pynlong da ka jingiakhih.
“Ka Union ka kyntu wat ia ka Governing Body ban kyrshan ia ka Union ha kane ka kam ban pynurlong ia ka jingdawa, ha kaba shen na ka liang ka Union kan sa leit ban iakynduh ia u DC katkum ba la ai jngmut da u HM” ula ong.
