Khluit tar ka jingiatai nia ha ka Dorbar Tlang
Shillong, Naiwieng 03 : Ka Dorbar Tlang jong ka Khasi Hills Autonomous District Council (KHADC) kala khluit tar ha ka jing iatai nia hynne ka sngi halor ka jingai Trading Licence hadien ka jingmih ka jingkynnoh ba ka Council kala dawa pisa haduh T. 1 klur ban ai Trading Licence ia ka kompani ba pyntrei ia ka surok 4-lane na Umshyrpi sha Baniun.
Kane ka jingkynnoh kala mih na u MDC ka Congress na Mylliem Bah RV Lyngdoh uba la ong ba kane kam dei satia ka jingkynnoh hynrei ka dei kat kum ka jingiaid ki khubor hamsaia ba ka Council kala pan T 1 klur ban ai Trading Licence sha kane ka kompani ba pyntrei ia ka surok.
Haba jubab ia ka motion bala wanrah da une u MDC ka Mylliem, u Executive Member ba khmih ia ka Tnad Trade Bah Rangkynsai Kharbuli ula kem bitar bad poi sha ka tied miej haba dawa ia u MDC ban weng noh ia kane ka jingkynnoh namar ba kam don satia kaba kum kata ka jingpan pisa ban Licence.
U Bah Rangkynsai ula ong ba kane ka jingkynnoh kan pynthohbria ia u kum u MDC na Umroi Constituency.
U MDC ka Congress ula kyntu ia u EM ba um dei ban tied miej bad ban nym shim ia kane ka kam kum ka kam shimet. “ Ngi ruh ngi nang ban tied miej ym tang ma phi. Hynrei ka jingshisha jong kane ka kam ka long ba tang u Chairman uba lah ban weng ia ki kyntien hynrei balei phi bthah ia nga ba ngan weng noh ia ki kyntien ba nga kren”.
Haba jubab bynrap, u CEM Bah Titosstarwell Chyne ula ong ba ka long kaba bakla shibun ban ong ba ka Tnad Trade kala dawa haduh T. 1 klur namar ba kam shym la don satia ka jingpynslem ban ai ia ka Trading Licence sha ka kompani ba pyntrei ia kane ka surok 4-lane.
Shuwa kane, une u MDC ka Congress ula kdew ruh ia ka jingkynnoh ba ki Ophisar ka KHADC kila dawa pisa haba iadei bad ka Umroi Aiport. Ia kane ka kam la wanrah sha ka jingtip jong ka Iingkashari High Court. “Ngim dei ban ailad b aka Ain kan dei ka lad sha ka kam bamsap” ula ong.
Halor kane, u CEM ula pyntip ba ka Council kala thung mardor ia ka Judicial Inquiry halor kane ka kam.
Haba jubab hashuwa kane, u EM ula pyntip ba ka kompani kaba pynmih ia kane ka jingkynnoh kam shym la wan mih satia hakhmat ka Judicial Inquiry bad kumta ia kane ka kam la shu pynwai noh.
