Shillong, Lber 02: Da ki spah ngut ki nongkyrshan jong ka kong Grace Mary Kharpuri kaba dei ruh ka kyrtong jong ka National Peoples (NPP) na Shella konstitwensi hynne ka sngi kila wiang ding iaki kper bad kila kawang maw iaka ophis Sohra Civil Sub Division.
Kane ka jingkhie bitar ki nongkyrshan ka NPP kadei hadien baka kong Grace Mary Kharpuri kala shah rem noh ha u kyrtong ka United Democratic Party (UDP) bad MLA ka Shella konstitwensi u bah Balajied Kupar Synrem.
La iathuh ba ki paidbah nongkyrshan kila ioh jingtip lyngba kawei ka News Channel baka kyrtong jong ka NPP ka kong Grace Mary Kharpuri kala jop ha kane ka ilekshon MLA 2023 hynrei hadien bala kut ka jingniew Vote la paw ba u nongjop udei hi u kyrtong ka UDP bad MLA ka Shella konstitwensi u bah Balajied Kupar Synrem.
Hadien ka jingpynbna iaka Resol bala jop u bah Balajied Kupar Synrem naka UDP, da ki spah ngut ki nongkyrshan ka Grace Mary Kharpuri kila khie jingbitar ryngkat bad ka jingkynnoh ba ka la don ka jingle tuh haka por niew Votes.
Ki nongkyrshan ka NPP kila sdang ban kawang mang, kila sdang ban wiang ding iaki kper ba don ha jan ka ophis Sohra Civil Sub Division bad kane kala pynlong iaki bor district ban pynjur iaki bor pahara daka ba synreit um sha ki nongkyrshan kiba thmu ban tur sha kane ka ophis.
Haba iadei bad kane naka liang u Chief Electoral Officer (CEO) ka Meghalaya u bah F.R Kharkongor ula ong ba kam mih ka jingkylli ban hap niew biang iaki Votes namar kam don satia ka jingbakla ne leh tuh haka por niew Votes.
U bah Kharkongor ula ong ba kane ka jingjia baroh ka mih namar ba ki nongkyrshan ki shah ialam bakla ha kawei ka News Channel bad kam don satia ka jingleh tuh ne bakla haka por niew Votes.
Ula iathuh ba naka liang ki bor district kila pynjari syndon daka Section 144 CrPC hapoh kane ka thain bad naka liang ka kyrtong ka NPP na Shella konstitwensi ka kong Grace Mary Kharpuri ruh kala kyntu iaki nongkyrshan ban jai jai noh.
Haduh ba thoh ia kane ka khubor, ka jinglong jingman hapoh ka thain kala jai jai ha ka ba ki nongkyrshan kila sdang ia pra ban leit noh shala ki ïng ki sem.
