“Kaei ba ki paidbah nongkyrshan ki angnud ïa kata hi ngan leh”
Nongstoiñ, Lber 2: U kyrtong ka HSPDP Mawshynrut Bah Methodios u la jop haduh 6286 vote pyrshah ïa u bah Gigur Myrthong sitting MLA jong ka NPP.
U Bah Methodios Dkhar haba kren sha ki lad pathai khubor hadien ba u la shimti ïa ka kam kum u MLA ba thymmai na Mawshynrut Constituency, u la ong, “Nga ai khublei kaba kyrpang eh sha baroh ki nongkyrshan bad ki nongtrei bad ki nongïalam jong ka Mawshynrut Constituency, kiba la trei shitrhem naduh ba sdang bad ïaishah ruh ïa ki jingeh kiba bun haduh ban da kheit ïa une u soh jingjop ba don burom”.
“Haba ngi la jop ngin nang ïai trei bad ïai pynbha ïa kiei kiba ki MLA barim ki la leh bad ban wanrah shuh shuh ïa ki kam pynroi bad ki jingkylla ki ban long ka jingmyntoi ïa ka dong ka thaiñ baroh kawei” ula ong.
U Bah Methodius ula ong “Ka Mawshynrut shisha ka dang donkam shibun ki jingkylla namar ka dang sahdien palat ha baroh ki liang, la ka long ha ka liang ka koit ka khiah, ka pule puthi bad bun bah kiwei pat”.
“Kaei kaba ki paidbah Mawshynrut ki angnud kata hi ruh ka dei ka jingangnud jong nga bad ïa kata hi ngan leh”, u la bynrap.
