Tinsukia, Nohprah 21:Ka jingiather kuli hapdeng ki bor bad ki suba riewkieng atiar jong ka kynhun ULFA-I kala jia ha ki bynta ka Upper Dihing hapoh Tinsukia district ka Assam hynne ka step ha kaba uwei na ki suba don jingiadei bad ka ULFA ia uba la tip kyrteng kum u Amit Mukhiar 29 snem rta ula ngat ha ka jingmynsaw.
Kane ka jingjia kala jia mynta ka sngi ha ka por kumba 4 baje mynstep hadien ba utei u suba donkti bad ka ULFA-I ula ngat ha ka jingdei kuli na ki bynta jong ka kjat.
Hynnin ka sngi ba Ar hadien ka jingioh jingtip kaba bnah, sawngut ki briew na ki bynta jong ka Pengeree PS ki la shah kem noh ha ki bor pahara bad na ka liang ki pulit ki suba jur ba kine ki briew ki dei kiba don bynta ha kaba ai jaka rieh bad ka bam ka dih na ka bynta ki dkhot jong ka ULFA-I ha ka miet jong ka 19 tarik mynta u bnai.
Hadien ka jingtohkit kine ki briew kila phla ba kila pynkhreh bam na ka bynta 7 ngut ki dkhot ka ULFA-I kiba shong riehtngen hapoh ki jaka khlaw ka Upper Dehing Reserve Forest.Kumta ruh mardor la ialam ia uwei na kine kiba la shah kem u Amit Mukhiar sha katei ka jaka khlaw ha ka por kumba 4 baje mynstep ban lapdien ia katei ka jaka kaba kila shet bam na ka bynta ki dkhot ka ULFA-I.
Katkum u SP ka Tinsukia u Abhijit Gurav la ong ba ha ka por kumba 4:50 mynstep katto katne ki lehnoh ki bym lah ban ithuh kila ther kuli sha ka kynhun pulit ba la lamkhmat da u SDPO ka Margherita.Na ka liang ki pulit ruh kila pynphai kuli markylliang bad hadien katto katne minit, kane ka jingiather kuli kala sangeh noh ha kaba la lapdien ia uwei u briew uba don jingiadei bad ka ULFA uba kyrteng u Amit Mukhiar ula mynsaw na ka jingdei kuli na ki bynta jong ka kjat.Hadien kane la pynkit noh ia u mar mar shapoh ka jaka sumar ha Digboi hadien ba la pynkynriah pat shapoh Tinsukia Civil Hospital.Ki suba dkhot ka ULFA-I kila phet krad noh na katei ka jaka da kaba shim kabu namar ka jaka khlaw ba rben bad namar ka jingdum.
Na kane ka jaka ki bor pulit kila ioh ruh ban kurup ia ki katto katne ki tiar ki tar kiba kynthup ia kawei ka pla, 3 ki PEK tube, detonators, 2 ki grenade bad kiwei kiwei.Ka jingkhynra ha katei ka jaka khlaw ka dang iai bteng.
