Nongstoin, Jylliew 9 : Hadien ba la sdang jai jai ka jingiakynad bad ki Nepali, mynta pat sa ka jingiakynad para Khasi kala mih hapoh ka thain Langpih na ka daw ka jingiaknieh ia ka bor synshar.
Jan man ki shnong ha ka thain kila don hapdeng ka jingiakynad para Khasi namar ka jingmih ki kynhun ba arliang mamla ban iaknieh ia ka bor Synshar-kawei ka kynhun jong u Syiem ka Hima Nongmynsaw bad kawei pat ka kynhun jong u Bah Hendro Samakha.
Ia kane ka jingiakynad la sakhi dang shen lyngba ka jingjia kaba jia ha ka 7 tarik Jylliew, 2024 ha Iew Langpih.
Kat kum ka khubor, la iathuh ba ha kane ka sngi, ka kynhun jong u Syiem ka Hima Nongmynsaw ka dang thmu ban lum ia ka bai musur na ka Iew Langpih hynrei ka kynhun u Bah Hendra Samakha kala leit ban khanglad ba khlem shah satia ban lum musur.
La iathuh ba kala don ruh ka jingiaktah kti hapdeng jong ki namar ka jingiapyrshang ban knieh ia ki slip lum pisa hynrei da ka jingdon jong ki Pulit ba pahara ha ka thain, la lah ban tem noh ia kane ka jingiakynad.
La iathuh ba kane ka jingsdang lum musur ka Hima Nongmynsaw kala jia naduh ka 31 tarik Jymmang 2024.
Haba iakren bad u Bah Phlowel Syiem, Acting Syiem ka Hima Nongmynsaw, ula ong ba ka Hima kala leit ban lum ia ka musur halor ka hok bad ka iktiar kaba ka KHADC kala pynkupbor ia ka Hima.
U ong, ba ka jingwan pyni bor jong uwei u riew shimet, ka long kaei kaei ka bym lah satia ban pdiang. U pyntip ba shen ka Hima kan sa lei tai da ka jingthoh sha ki bor ka KHADC ba kan tuklar lem halor kane ka kam.
Kumjuh ruh u bah Hendro ula pynpaw ba na ka liang ka jong u bad ka kynhun jong u, da lei lei ruh kin ym shah ban lum musur na ka Iew namar ka Hima Nongmynsaw kam don hok satia ban leh ia kata.
Kat kum ka jingong jong u, ka Iew ha Langpih ka dei kaba la seng da ka Hima Raidmynsaw hapoh ka jingialam jong u mynba u dang dei u Sordar.
