Nongpoh, Jymmang 03: Ka Dorbar Shnong Pahamrioh Them ha ryngkat ka Seng Samla jong ka Shnong, kila pynlong ia ka jingkhynra labour licence ia baroh ki bar jylla kiba trei ha ki restaurant bad ki dhaba ba don ha u pud u sam jong ka Shnong.
Ia kane ka jingkhynra la ialam da u Rangbah Shnong Bah Ronald Khongjoh bad u President ka Seng Samla ka Shnong samla Banjop Ryndong.
Kane ka jingkhynra kala wan jia hadien ba ka Shnong kala iohi ia ka jingkynrei ka jingwan poi ki bar jylla hapoh ka shnong ban trei ban ktah ha ki Restaurant bad ki Dhaba. Ka Shnong kala shim ia kane ka sienjam ban pynthikna ba ki bar jylla ba wan trei hapoh ka Shnong ki dei ban don ia baroh ki kot ki sla kiba donkam khlem da pynkhein ia ki ain ka Jylla.
Kine ki Nongialam Shnong kila pyntip ba ha kane ka jingkhynra, kila lap ba don ki bar jylla kiba pyndonkam da ki kot ki sla ba ioh na ka Ophis u Deputy Commissioner hynrei kim don pat ia ka Labour Licence kaba dei jong ka KHADC. Kila ong ba kane ka jingshem ka pyni ba ki bar jylla kim khein kor ia ka bor jong ka District Council.
U Rangbah Shnong ula mana ia baroh ki bar jylla ki bym don ia ki kot ki sla kiba biang, ba kim dei ban shong trei bylla hapoh ka shnong bad lada ka shnong ka lap kan sa shin da ki sienjam kiba tyngeh kat kum ki kyndon jong ka Shnong.
