Shillong, Rymphang 27: Ka Liang Pyrshah ha Iingdorbar Thaw Ain ka Jylla hynne ka sngi Ba-ar kala mih jyndat noh napoh ka Dorbar kum ka dak ban pyrshah ia ka voting of demand for grant shuwa ba u Myntri pla tyngka un jubab ia ka jingiatai ia ka mang tyngka.
Haba wanrah ia ka point of order ha ka sngi kut jong ka Dorbar mang tyngka, u MLA ka Congress na Umsning Dr Celestine Lyngdoh ula ong ba ka jingkren u Myntri Rangbah ka Jylla Conrad K Sangma, uba khmih ruh ia ka pla tyngka, ba ka voting on demand for grant ba la dep leh ha ka sngi Thohdieng ka dei na ka bynta ka supplementaru demand, ka dei kaba bakla namar ia ka supplementary demand la dep leh naduh ka 21 tarik Rymphang.
“Lada ngi ong ba ka voting for demand for grant lah ban leh shuwa ka jubab u Myntri pla tyngka, ka mut ba kane ka jubab u Myntri haba kut jong ka jingiatai iaka mang tyngka kam don jingmut shuh” ula ong haba bynrap “Nga kwah ia kane ka Iing ba kan bud ia ki rule. Lada ka iing kam bud ia ki rule, kaei ka jingmut ia ngi ban shong hangne bad ban sngap”.
U Dr Celestone ula kyrpad ia u Lamphang ban weng noh ia ki kyntien ba ula pyndonkam ba kila shu pynsyrwa kai ia ka por bad ban pynbeit da kaba pynbeit ia ka jingkren ba iaam bakla jong u Myntri Rangbah ba ong ba ka sngi Thohdieng ka dei kaba vote ia ka supplementary demand ka long kaba bakla bad kaba hap ban pynbeit.
“Lada ki dei ban vote ia ka mang tyngka jong une u snem ha ka sngi Thohdieng, ka mut ba ngi la iaid palat ia ki kyndon jong ka rules” ula ong.
Ia kane ka point of order u Dr Celestine la kyrshan da ka All India Trinamool Congress (TMC) bad ka Voice of the People Party (VPP).
Haba ai ia ka rai, u Lamphang Thomas A Sangma ula ong “Ngam don jingmut satia ban ong ba kane ka Iing kala shu pynsyrwa kai ia ka por. Ha ka jingshisha namar ka jingduna palat ka por, nga la bthah ban nym kren ia ki kam ki bym donkam bad ban kren beit thik tang ia ka mat. Hynrei, nga pynbeit noh ia ka jingkren jong nga bad ia ka kyntien pynsyrwa kai ia ka por yn weng noh naka jingiakren jong ka Iing”.
“Hynrei, ia ka ishu kaba ar, ki sngi pynlong ia ka dorbar (calendar) ka dei kaba la rai hapoh ka BAC bad la buh ruh hakhmat ka Iing ha ka sngi sdang jong ka Dorbar myn ha ka 16 tarik Rymphang bad la iamynjur ruh da ka Iing. Kat kum ka rule, ka jingpynsangeh shipir ia ka rule lah ban wanrah da ka Parliamentary affairs hynrei naba nga la dep ban ai ia ka rai, kumta ka rai jong nga ka dei kaba kut” ula ong.
Namar ka jingbym hun ia kane ka rai jong u Lamphang, ki Dkhot ka Liang Pyrshah na baroh lai tylli ki seng sain pyrthei, kila mih jyndat noh napoh ka Iingdorbar ban pyrshah ia ka jingbym lah jong ka Sorkar ban pynbeit ia ki jingbakla.
Haba ieng iada ia ka Liang Synshar, u Symbud Myntri Rangbah ba khmih ia ka Parliamentary Affairs Bah Prestone Tynsong ula ong “Ka rai jong phi (Lamphang) ka long kaba shai bha. Naduh ka sngi nyngkong ngi la wanrah (calendar) hapoh ka BAC bad hapoh ka Iing bad ngi la ai ka jingmynjur”.
Haba u Dr Mukul Sangma ula ieng ban iasnohkti lang bad kiwei ki dkhot ka Liang Pyrshah bad ong ba ka jingmih jyndat ka dei kum ka jingpyrshah bad jingbym mynjur ia kaei kaba ka Sorkar kaba leh, u Bah Prestone ula kynthoh “Ka Liang Pyrshah kala pynman kale ialade. Kane ka calendar (sngi shong dorbar) ka dei kaba la mynjurda ka Iingdorbar ha ka sngi sdang jong ka dorbar, kumno ngin phai dieng biang ia ka”.
Haba niew ia kane ka jingleh ka Liang Pyrshah kum ka kam ka bym iahap, u Myntri Rangbah Conrad K Sangma ula ong ba ki dkhot ka Liang Pyrshah kila shu pynlong ishu khlem daw ha kaba ma ki hi dalade kila iadonbynta haba shim rai ha ka por ba ka Iingdorbar ka pdiang ia ka calendar (sngi shong dorbar) bala tyrwa da ka BAC.
Ula kynnoh ruh ia ka Liang Pyrshah ba kam kwah ban sngap ia ka jubab halor ka jingiatai ia ka mang tyngka hadien ka jingiohi ia ki jait kam kiba la pyntreikam hapoh ka Jylla.
“Na kaei kaba nga sngetwhuh, kila wad daw ban nym sngap ia ka jubab bad kumba nga ong, kine ki dei ki kam kiba kongsan namar ka jingkren halor ka mang tyngka bad ka jubab kan dei kaba phaikhmat sha kiba bun ki kam, hynrei yn ong kumno, ka dei ka rai jong ki bad ka Jylla baroh kawei ka peit ia kane” ong u Myntri Rangbah.
