Shillong Nailar 17: U President jong ka United DemocraticParty (UDP) u Bah Metbah Lyngdoh u la ong ba ka UDP kan ym iatehlok ban kano kano ka seng ha ka jingiakhun iaka elekshon MLA ban wan bad ka UDP ka buh iaka thong ban jop palat 30 ngut ban thaw hi iaka sorkar.
“Ka UDP kan ym iatehlok bad kano kano ka seng haka elekshon ban wan” ong u Bah Metbah haba bynrap ba ka UDP kala pynkhreh bha iaka elekshon bad ka buh thong ban jop palat 30 ngut ki kyrtong.
Halor ka jingkylli ia ka jingiatehlok bad ka HSPDP, u Bah Metbah u la ong, “Ia mynta kam pat don eiei kaba kum kata, tad lada don da kano kano ka jingiakren kaba da kumwei namar haduh mynta ka UDP bad HSPDP ki dang don hapoh ka shatri jong ka RDA bad kan pynneh beit ia kane haduh ban da kut ka samoi kumba ngi la ia kular, hynrei na ka bynta ka samoi ban wan kam pat don kano kano ka jingiakren ne ka jingiashong ban pyrkhat”.
U President ka UDP u la ong, ka seng ha ka jingshisha kala thmu ban pynbna noh iaka kyrteng jong ki kyrtong mynta u bnai hynrei kan dang pynjlan shuwa namar baka seng ka kwah ban pynbna ia bun ngut ki kyrtong ha ka wat kaba nyngkong.
U la ong, kumba long mynta kin don 5 ngut ki MLA kiban sa pyniasoh noh bad ka UDP.
Ka UDP kala iaid shakhmat ban pynkhreh iaka elekshon MLA ban wan bad ki dak ki shin ki paw shynna ba ka don ka jingkyrmen kaba khraw khamtam haba ki nongialam bapher bapher ki wan ban pyniasoh bad ka seng UDP ban pynkhlain shuh shuh iaka seng haka elekshon.
Haba kylli la ka jingwan pyniasoh u Bah Monarch Shabong bad u Bah Wellbirth Rani kadei ba ki don jingthmu ban iakhun iaka elekshon, u Bah Metbah u la ong “Kam don eiei ruh em kaba kum kata ka jingthmu ban ialeh elekshon. Ka jingwan pyniasoh ka jongki ka long kaba shai kdar bad kata ka long ban pynkhlain iaka seng ka jong ngi.
Na ka liang u Bah Wellbirth Rani u la ong, “Lada ka seng ka ibit ia nga ban ialeh iaka elekshon MLA, Nga long u briew uba la kloi bad uba la pynkhreh, kata ka shong ha ka seng bad nga ieh haka jingstad jong ka seng”.
Ha kaba iadei bad ka jingkren u Bah Metbah ba ka jingwan pyniasoh ka jongu kadei ban pyn khlain iaka UDP ym ban iakhun elekhson, u Bah Wellbirth u la ong, “Kaba nyngkong kadei ban long kumta, namar nga dei u riewrangbah bad u nongialam bad ngam shim la pan eiei naka seng”.
“Nga wan ban pynkhlain iaka seng. Lada ka seng ka iohi pat bad nga dei ban mih ban ialeh iaka elekshon, nga long uba kloi ban mih ban ialeh bad nga long uba la pynkhreh ban iakhun na Mawphlang Constituency kumba baroh kila ia tip namar ka shnong ka jong nga kadei na Tyrsad” ula ong.
Hadien ba nga la shongthait kum u President ka FKJGP, ka mynsiem ka jong nga kam shah ba ngan shu shong thylli bad nga la shim iaka sienjam ban pyniasoh bad ka seng sain pyrthei bad nga la rai ban pyniasoh bad ka UDP ban pynim ia kata ka jingsngew trai ri.
“Ka UDP kadei ka seng kaba biang bha ia nga ba ngan trei bad ban ai ka jingshakri kaba kham bha bad nga sngewnguh ia kane ka seng kaba la pdiang burom ia ngi da u President ba rangbahduh u Bah Metbah Lyngdoh, Bah Jemino Mawthoh, Bah Paul Lyngdoh bad u Bah TW Chyne”.
