Shillong Jylliew 09: Lashai ka sngi Saitjain, ki 4 tylli ki kynhun ialehkai Football kin iakhun iaka semi phainal kaba nyng kong jong ka Meghalaya State League 2023 hadien ba kila ioh ban long ki lahduh haki Group Stage ha ka jingiakhun jong ka Leaque stage.
La jan shi bnai, ki kynhun ialehkai kiba la iashimbynta haka MSL kila iakhun ban sei iala ka syep ka syar, ka sap bad iala ka bormet ban long ki lahduh ban ioh rung sha ka semi phainal.
Ka Rangdajied United (Group B) kan iakhun pyrshah iaka Shillong Lajong (Group C) kin iakhun iaka semi phainal kaba nyngkong lashai ka sngi ha ka por 1:30 mynsngi ha Kiang Nangbah Stadium, Jowai. Ha kane kajuh ka sngi ha ka por 3:30 mynsngi ha PA Sangma Stadium, Tura ka jingiakhun ia ka semi phainal kan long hapdeng ka Khliehmawlieh (Group D) pyrshah iaka Mawlai (Group A).
Ia kine baroh ar tylli ki jingiakhun yn pyni Live ha ka Meghalaya State League’s official YouTube channel (youtube.com/@meghalayastateleague).
Ka jingiakhun baar jong ka semi phainal kan long haka 13 tarik bad ia ka phainal yn pynlong ha ka 17 tarik ha SSA Stadium, First Ground, Polo Shillong.
Kadei ka sien kaba nyngkong eh iaka Mawlai ban iashimbynta ha ka MSL katba t ki 3 tylli ki kynhun pat kidei kiba la ialehkai teng ha kane ka lympung iakob ha ki snem kiba la dep.
Hashwa ban sdang ka jingiakhun haka sngi saitjain, u Brolington Warlarpih jong ka Mawlai ula ong, “Nga dap da ka jingkmen ban don ka Meghalaya State League namar ba ngim pat ju ioh ban iakhun ha kum kane ka lympung ha kaba ki kynhun ialehkai Football na kylleng ki District kin wan ban ialehkai lang. Ka long kaba bha shibun ia ki nongialehkai namar ka ailad ia kito kiba wan na ki thain nongkyndong ba kin shah peitkhmat bha ban shah jied ha ki Club kiba heh”.
“Ka Mawlai kala trei shitom naduh kaba sdang bad nga ai ka jinngsngewnguh ia ki nongkyrshan jong ka Club bad nga kyrmen skhem ba kin bteng ban kyrshan ia ngi ha ka lynti ban leit sha Tura” ong u Warlarpih, uba long u kapten jong ka club ha ka jingiakhun haka Shillong Premier League ha u snem ba la dep.
Ka Lajong kan ialeh ban iakhun tyngeh ban bat biang ia ka nam lahduh haka MSL mynta ka kynti ruh bad kane ka kynhun kala wan iakhun kham slem ha ka MSL namar ka jingiashimbynta haka All India Football Federation, Second Division League, ia kaba ka SLFC kala lah ruh ban kiew kyrdan ban leit iakhun ha ka I-League ha ka samoi ban sa wan.
Ka SLFC kan iakhun pyrshah iaka Rangdajied bad kane ka jingiakhun ka jongki kan long kum ka jingiakynduh biang kumba kila iakynduh haka phainal jong ka MSL ha u 2019.
U Youth Development Coach ka SLFC u Bah Lekini Suting ula ong, ba ka jingjop ka jongki ha ka Second Division kala nang ai mynsiem ia ki rangialehkai khamtam eh ia ka kynhun jong ka SLFC kaba bun kiba dang khynnah ba kin bteng ban ialehkai bha ha ka jingleit iakhun ka jongki ha nongbah Jowai haka jingiakhun kaba nyngkong jong ka semi phainal pyrshah iaka kynhun kaba pawkhmat bha.
