Shillong, Jan 11: Ka Mawlai kala pynrem da 8-0 ia ka Khliehmawlieh haka jingiakhun haka Quarterfinal jongka Meghalaya State League 2024 kaba la long ha ka sngi saitjain ha SSA Stadium bad kala ioh rung syndon sha ka Semi Final.
Ha kawei pat ka jingiakhun, ka Ladthadlaboh kala pynrem iaka Sutnga da 5-2 kol ha ka jingiakhun kaba la long ha Diengshynrum, Khliehriat, katba ka Shillong Lajong kala ioh rung sha ka semi final da kaba pynrem iaka Rangdajied United da 3-1 Quarterfinal kaba nyngkong eh kaba la long ha ka taiew bala dep.
Ka Sutnga bad ka Ladthadlaboh kim pat ju iakynduh ha kane ka lympung iakob ialehkai, ka Sutnga kaba mih na ka East Jaintia Hills, mar ia sdang ka jingiakhun kala ioh thep ia ka kol ha ka minit kaba 13 lyngba u Raplangki Lyngdoh. Hynrei 10 minit shwa ban kut noh ka kylla step ka Ladthadlaboh kala ioh ban pyniakhiad lyngba ka kol kaba la thep da u Rangdajied Sayoo ha ka 36 minit.
Ha ka jingiakhun ia ka kylla miet ka Ladthalaboh kala ialehkai bha ha kaba u Dangaitlang Mulieh ula thep ia ka kol ha ka 51 minit, u Rangdajied ula ioh thep ia ka kol ka baar ka jongu ha ka 68 minit, u Banteilang Shylla ula thep ha ka 70 minit bad u Dowell John Shylla ula thep kol ha ka 89 minit.
Katba u Solmon Sympli ula ioh thep ia ka kol ha ka minit kaba 77 na ka bynta ka Sutnga.
Ka Khliehmawlieh kadei ka kynhun kaba la pynrem ia ka Mawlai ha ka semi final jongka MSL 2023, hynrei mynta ka kynti kala Mawlai kala ioh ban pynrem kylla ia ka Khliehmawlieh.
Ka Mawlai kala ioh thep 2 kol ha ka kylla step ha ka minit kaba 26 bad u Khrawkupar Jana ula thep ha ka minit kaba 35 bad ka Mawlai kala bteng biang ban thep kol ha ka kylla miet, ha kaba u Robert Khongriah ula thep kol ha ka 53 bad 55 minit, u Romarius Laban ula thep kol ha ka 64 bad 83 minit bad u Khrawkupar ula thep kol biang ha ka 87 minit bad Kevin Rymbai ula thep ia ka kol ha ka (90’+1).
Namar ka jingialehkai bha u Robertson ula ioh ia ka nam Player of the Match bad ula ioh pdiang ia katei ka khusnam na u President ka Meghalaya Football Association u Bah Hamletson Dohling.
Ka Quarerfinal kaba khatduh kan long hapdeng ka Chipakkore pyrshah ia ka Rymbai Shkenshynriah ha ka 14 tarik u Kyllalyngkot ha PA Sangma Stadium, Tura ha ka por 1 baje mynsngi.
