Shillong, Naiwieng 03: Ka Shillong Lajong kala kylla long ka kynhun kaba nyngkong eh ban ioh rung sha ka Quarterfinal jong ka Meghalaya State League 2024 da kaba jop ha ka Group E pyrshah ia ka Mawtari Myrdon da 4-0 ha ka jingiakhun kaba la long haka sngi Saitjain.
U Yohaan Benjamin ula thep kol ha ka minit kaba 17, u Deibormame Tongper ula thep kol ha ka 19 bad 66 minit bad u Rimankhraw Kharumnuid ula thep kol ha ka 29 minit bad kane ka jingjop kala pynlong ia ka Shillong Lajong ban ioh khur 9 point bad ban ioh rung syndon sha ka Quarterfinal.
Ka Mawtari Myrdon kala ioh 6 point bad ka dang ap mynta ban dep ia ka jingiakhun jong kiwei pat ki kynhun haka Group la kan ioh rung ne kan ym ioh rung sha ka Quarterfinal.
Ka Rymbai Skhenshynriah kala iohbat iaka kyrdan kaba nyngkong ha ka Group D da kaba pynrem da 5-0 ia ka Iatyllilang Lumsehkot Raliang ha ka jingiakhun kaba la long ha Khliehriat.
U Hesmiki Rymbai ula thep kol ha ka minit kaba 4 bad 60, u Iaishah Bareh ha ka 61 minit bad u Md Aruwas Khan ula thep kol ha ka 75 bad 82 minit bad mynta ka Rymbai kala long kala wan nyngkong haka kynhun da kaba tam da ka Goal Difference ne ka jingiapher haka jingthep kol haba ianujor bad ka Rangdajied United.
Ha ka Group A, kala don ka jingiajan haka jingkamai point hapdeng baroh 6 tylli ki kynhun, ha kaba ki 3 tylli ki kynhun kiba la wan shakhmat kala do nka jingiapher tang mar 1 point bad ki dang sah sa mar kawei ka jingiakhun.
Ka Pinggera Do•gisik’s kala pynrem da 2-0 ia ka Atong Matgrik ha kaba u Jerime B Marak ula thep ia ka kol ha ka 40 minit bad u Trainingbath M Sangma ula thep haka minit kaba 90’+1 ha ka jingiakhun kaba la long ha Tura.
Ka Pinggera Do•gisik bad ka Lumsohkhlur kila ia kamai mar 3 point, katba ka Chipakkore kala ioh 4 point.
Ha ka Group F, ka Seng Samla Mawmluh kala pynliem ia ka Patharkhmah da 5-3 ha ka jingiakhun ha nongbah Shillong. U Ksankupar Khongngain ula thep ia ka kol ha ka minit kaba 19′ bad 45’+1, u Damutskhemlang Thabah ha ka 20 minit bad u Balajiedlang Lyngwa ula thep iaka kol ha ka 46 bad 70 minit naka bynta ka Mawmluh.
Katba u Banpyndap Dkhar ula thep ia ka kol ha ka 13 minit, u Damanbha Wahlang ha ka 47 minit bad u Newbirthson Sankli ula thep haka minit kaba 50 na ka bynta ka Patharkhmah.
Ha ka Group C, ka Ladthadlaboh kala bteng ban jop arsien lynter da kaba pynrem da 2-0 ia ka Nangkiew Shaphrang Lumdiengngan bad ia ki kol la thep da u Banteilang Shylla ha ka 25 minit bad u Samuel Phawa ha ka minit kaba 41 ha ka jingialehkai kaba la long ha Tyrsad.
Ha ka Group B, ka Khliehmawlieh kala pynrem noh ha ka Riangdo Youth da 3-2 ha ka jingiakhun kaba la long ha Mawkyrwat, ha kaba u Philip Nongsiej ula thep ia ka kol ha ka 29 minit bad u Batskhemlang Thongnirit ula thep ha ka 63 minit ia ka Riangdo Youth, hynrei ka Khliehmawlieh kala lah ban beh bad u Samuel Shadap ula thep ia ka kol ha ka 66 bad 85 minit bad u Kyntiewbor Myrthong ula thep ia ka kol kaba la pynjop syndon ha ka minit kaba 90’+2.
Ka Resol haka sngi Saitjaiñ
Group A (Tura): Atong Matgrik 0 – 2 Pinggera Do•gisik
Group B (Mawkyrwat): Riango Youth 2 – 3 Khliehmawlieh
Group C (Tyrsad): Ladthadlaboh 2 – 0 Nangkiew Shaphrang Lumdiengngan
Group D (Khliehriat): Iatyllilang Lumsehkot Raliang 0 – 5 Rymbai Skhenshynriah
Group E (Wahiajer): Mawtari Myrdon 0 – 4 Shillong Lajong
Group F (Shillong): Seng Samla Mawmluh 5 – 3 Patharkhmah
Ki jingiakhun ha ka Sngi Nyngkong ha ka por 2 baje mynsngi
Group A (Tura): Lumsohkhlur vs Atong Matgrik
Group B (Mawkyrwat): Khliehmawlieh vs Sutnga
Group C (Tyrsad): Ladthadlaboh vs Seven United
Group D (Khliehriat): Rangdajied United vs Iatyllilang Lumsehkot Raliang Group E (Wahiajer): 7 Wasa United vs Seinbhalang Shkentalang
Group F (Shillong): Patharkhmah vs Mawlai
