Shillong, Naiwieng 01: Ka Mawlai, Sutnga, Rangdajied United bad ka Chipakkore kial long ki kynhun kiba la ioh khur ia ka jingjop hyne ka nsgi Thohdieng ha ka jingailehkai Football jong ka Meghalaya State League 2024, kaba la pynlong daka Meghalaya Football Association da ka jingkyrshan ka Tnad Sports and Youth Affairs ka sorkar jylla.
Ka Mawlai bad ka Sutnga kila ioh ban jop arsien ha ki jingiakhun ha ka Group E bad B, katba ka Rangdajied bad Chipakkore, kaba don ha ka Group D bad A, kila ioh mar 4 point hadien ba kila mad ia ka jingiakhaid haka jingiakhun ha ka sien kaba nyngkong.
Kiwei pat ki kynhun kiba la khur iaka jingjop hynne ka sngi ki kynthup ia ka Seven United ha ka Group C kaba la pynliem ia ka Mawlum Tyrsad da 1-0 kaba la long ha Tyrsad ha kaba u Kenny Syiemiong ula thep ia ka kol ha ka minit kaba 17. Kumta ka Mawlum Tyrsad kala mad arsien lynter iaka jingrem, katba ka long pat ka jingjop ha ka sien kaba nyngkong eh ia ka Seven United.
Ka Mawlai kala pynrem iaka Pynursla United da 11-0 ha kaba u Khrawkupar Jana ula ioh thep 6 kol kaba kynthup ia ka Penalty ha ka minit kaba 27, 32′, 44′, 64, 69′, bad 79.
U Khrawkupar ula ioh thep 4 kol ha ka jingialehkai kaba nyngkong bad mynne ka sngi ula ioh thep sa 6 kol bad kumta ula ioh thep 10 kol baroh.
Kiwei pat kiba la thep kol na ka bynta ka Mawlai ki kynthup ia u Reformer Pale ha ka 9 minit, u Arkibor Makhroh ha ka 11 bad 70 minit, u Wanboklang Lyngkhoi ha ka 25 minit bad u Samlang Rympei ha ka 52 minit.
Ka jingiakhun ka Chippakkore pyrshah ia ka Lumsohkhlur ha Tura kala i kumba kan kut ha ka jingiakhiad hynrei 20 minit shwa ban wai noh ka jingiakhun u Balthu M Marak ula thep ia ka kol ha ka 71 minit bad u Bijay R Marak ula thep kol ha ka 89 minit kaba la pynthikna iaka Chippakkore ban khur iaka jingjop da 2-0.
Ha Mawkyrwat, ka Sutnga kam shym la mad ia kano kano ka jingeh ha ka jingiakhun pyrshah ia ka Mawten bad kala pynrem da 4-0 bad ia kitei ki kol baroh kala thep haka kylla step.
U Raplangki Lyngdoh ula thep ia ki kol ha ka minit kaba 5 bad 45’+2, katba u Deligent Pdang ula thep ha ka 7 minit bad Skhemborlang Rupai ha ka 41minit.
Ka Rangdajied kala pynrem da 2-0 ia ka Mulait United haka jingiakhun kaba la long ha Khliehriat.
U Pasborlang Khonglikong ula thep kol ha ka 29 minit katba u Owanijuh Pajuh ula thep ha ka minit kaba 90’+4 kaba la pynskhem iaka Rangdajied ban khur ia ka jingjop.
Ka resol mynta ka sngi
Group A (Tura): Chipakkore 2 – 0 Lumsohkhlur
Group B (Mawkyrwat): Mawten 0 – 4 Sutnga
Group C (Tyrsad): Mawlum Tyrsad 0 – 1 Seven United
Group D (Khliehriat): Rangdajied United 2 – 0 Mulait United
Group E (Wahiajer): ym don jingiakhun
Group F (Shillong): Mawlai 11 – 0 Pynursla
Ki jingiakhun ha ka sngi Saitjain ha ka por 2 baje mynsngi:
Group A (Tura): Atong Matgrik vs Pinggera Do•gisik
Group B (Mawkyrwat): Riango Youth vs Khliehmawlieh
Group C (Tyrsad): Ladthadlaboh vs Nangkiew Shaphrang Lumdiengngan
Group D (Khliehriat): Iatyllilang Lumsehkot Raliang vs Rymbai Skhenshynriah
Group E (Wahiajer): Mawtari Myrdon vs Shillong Lajong
Group F (Shillong): Seng Samla Mawmluh vs Patharkhmah
