Shillong, Iaiong 22: Ka kol kaba ibang bha ba la thep da u Bankheinlang Rongring ka la pynioh ia ka kynhun Janepih YSCA ban pynliem ia ka A’chik SCO Rongjeng da 1-0, ha ka lympung ialehkai 5th Meghalaya State League, ba long ha Williamnagar mynta ka sngi.
Kane kan dei artad ka sien jop kaba lai ia ka Janepih kaba la biang pura ia ka ba kan don halor duh jong ka miej iakhein point bad khlem da shah thep wat tang shi kol ruh ha kane ka lympung.
Haba phai sha ka ASCOR, ym dei ba ka la ialehkai sniew, pynban ki rang ialehkai ki jong ka, ki la ialehkai tyngeh, hynrei hakaba kut kin hap pat ban pdiang ia ka namrem kaba long artad kaba ar naka bynta jong ki bad ban khur mynta 3 point bad ban don ha ka kyrdan kaba saw napdeng ki san tylli ki kynhun ba don ha kane ka group.
U Bankheinlang u la ioh ban thep ia kane ka kol, hadien ka jingwan mih ka jong u na ka ben shong (substitute), bad ba un ioh ia ka kabu kaba paka ban thep ia ka kol.
Ha kawei pat ka khubor, ka don ka jingpynkylla haba iadei bad ka por jong ka jingpynialehkai ia ka Group A kaba la buh ban long lashai ka sngi, ha kaba ka jingiakhun ba nyngkong la buh ba kan long noh ha ka por 1 baje mynsngi ban iakhun hapdeng ka Umkaber SCC pyrshah ia ka Khimusniang SC.
Katba ka kynhun ialehkai ka Nongkseh SSCC kan mih madan ban iakhun pyrshah ia ka Mawshun SCC ha ka por 5 baje janmiet.
