Shillong, Naiwieng 08: Ka Seven United kala ioh khur ia ka jingjop ha ka jingiakhun kaba khatduh ha ka Group ha ka lympung iakob ialehkai Football ka Meghalaya State League 2024, da kaba pynrem ia ka Nangkiew Shaphrang Lumdiengngan da 2-1 hynne ka sngi Palei kaba la long ha Tyrsad.
Kine baroh ar tylli ki kynhun kila ioh khur mar 3 point na ki 2 tylli ki jingiakhun hynrei ka Lumdiengngan kala khlain pat ha kaba iadei abd ka jingiapher haka jingioh thep bun kol ha ka Group C.
Ka Lumdiengngan kala ioh ban thep nyngkong ia ka kol ha ka minit kaba 22 lyngba u Kitboklang Sohtun bad ha ka 41 minit u nongialehkai ka Nangkiew Shaphrang u K Sammuel Kurbah ula ioh ban pyniakhiad ia kane ka jingiakhun ha ka kylla step.
Ha ka kylla miet ka Seven United kaba la ioh biang ban thep iaka kol ha ka 77 minit lyngba u Kenny Syiemiong bad kane kala pynthikna syndon ban ioh khur ia ka jingjop.
Ka Seven United kala wan ha ka kyrdan ka baar ha ka Group C hadien jong ka Ladthadlaboh kaba la wan nyngkong.
Lashai ka sngi Thohdieng, ka Meghalaya Football Association kan sa pynbna bad pyllait ia ka thup jong ki kynhun kiban jam shaphrnag ha katei ka lympung ialehkai bad khamtam hadien ba ka Tournament Committee kan pynshai iaka jngbat kyrdan ki kynhun kiba don ha ka Group B ha kaba 3 tylli ki kynhun kila ia kamai mar 3 point.
Dang shen, ka MFA kala pynbna ban pynsangeh shwa shipor ia ka MSL ban plie lad ia ki nongialehkai kiba mihkhmat ia ka jylla Meghalaya ba kin pynleit jingmut na ka bynta ban iashimbynta ha ka National Football Championship ne ka Santosh Trophy 2024-25.
