Shillong, Jymmang 11 : Baroh san tylli ki club ialehkai bna nam jong ka nongbah Shillong ba kynthup ia ka klob kaba bat ruh ia ka nam kum ka lahduh jong u snem bala lah-ka Mawlai SC, Shillong Lajong FC, Nongkseh SSCC, Nangkiew Irat SC bad Rangdajied United FC, ki la jam sha ka quarterfinal jong ka lympung 5th Meghalaya State League ka jingioh ia ka nam jop ha ki jingiakhun ka Round of 16 ba long ha ka sngi Nyngkong.
Nalor kitei ki kynhun ialehkai, sa artylli ki club kiba la jam shakhmat ha kane ka lympung ialehkai ki dei ka Maram FC bad ka bad Rymbai Shkenshynriah.
Katba ka jingiakhun ha Mairang, kaba dei hapdeng ka Langsning FC pyrshah ia ka Lumphyrnai Sohphoh FC, la hap ban pynsangeh noh namar ka jingbym ailad jong ka suin bneng bad ia kane ka jingiakhun yn pynkynriah nohka sha madan ialehkai jong ka Shillong’s SSA Stadium bad ba kan long lashai ka sngi ha ka por 6:45 janmiet.
Na ki result jong ka jingiakhun ba long hynne ka sngi, ka Nangkiew Irat ka la hap ba kan iakhun tyngeh ban lah pynliem ia ka Khimusniang SC da 2-1.
Katba ha ka jingiakhun ba long ha Amlarem, ka Mawlai SC ka la pynpaw ia ka sur ialehkai kaba khlain palat liam tad haduh ba kan da lah ban pynliem ia ka Thangskai Tiger SC da 11-0.
Ki rang ialehkai ka Mawlai ba ioh ban thep ia kine ki kol ki long Robertson Khongriah uba ioh hattrick (13′, 18′, 32′) , Wadshwa Latoo (56′, 81′) , Jestibor Mawlong (83′, 88′), Samlang Rympei (28′), Fairming Suting (45’+1), Kevin Rymbai (57′) bad u Basuklang Bina (59′).
Ha kane ka kynti jongka jingiakhun, ka Mawlai SC ka la wanphai pura biang kum ka kynhun, hadien ba ki rang ialehkai kiba pura ki jong ka, ki la wanphai noh sha la iing hadien ba ki la dep ban iashim bynta ha ka lympung I-League 3 ba long ha Manipur.
Ha kawei pat ka jingiakhun, ka kynhun ialehkai jong ka Shkenshynriah ka la lah ban pynliem iaka Amlarem SC da 2-0 bad ia kine ki kol la thep ia ki da u Hesmiki Rymbai (7′, 26′).
Katba ka lahduh jong kane ka lympung ha u snem 2023-ka Rangdajied United FC kala lah ban pynliem ia ka Janepih YSCA da 3-1.
Kane ka jingiakhun ka dei kaba la pynlong ha Williamnagar bad ba la wan ban sakhi da u paidbah byllein, kaba u da hun shisha jrut ban ioh ban peit bad sakhi ia kane ka jingiakhun kaba iakhaid bad kaba da ia biang bor, namar tad haduh ba kut ka por ba la buh ki ar kynhun ba kin iakhaid shwa, bad hadien kane, la rah pat ia ka sha ka extra time, kaba hangne ka Rangdajied ka la bteng ba kan ioh pat ba kan thep ia ki kol ba sah ki jong ka bad khur syndon ia ka nam jop.
Katba ka lahduh u snem 2019, ka Shillong Lajong FC ki la lah ban pynliem da 5-0 ia ka Mishon SSCC, ha ka jingiakhun ba la long ha Wahiajer, bad u nam tam ha kane ka jingiakhun u dei u Fridison Wanniang uba ioh hattrick (57′, 81′, 86′) bad u Deibormame Tongper (45’+2) katba sa shi kol ka dei ka own goal.
Ha ka jingiakhun ha Mawkyrwat, ka Maram FC ka la lah ba kan pynliem da 1-0 ia ka Seng Samla Umdang Pyllun ba da kane ka shi kol la thep ia ka ha ka minit ba 68 da u Tremarchwal Ch Marak.
Ka jingiakhun ba khatduh jong ka sngi ka dei ka jingiakhun hapdeng ka Nongkseh SSCC kaba la lah ban pynliem ia ka Mawphu da 4-0 kol bad ia kine ki kol la thep ia ki da Hardy Cliff Nongbri (36′, 66′), Shano Tariang (45’+8) bad u Chesterpaul Lyngdoh (64′).
