Shillong, Risaw 30 : Ka Shillong Lajong kala khur biang ia ka jingjop ha ka jingiakhun kaba ar ban long ka nongialam ha ka jingkamai point hapoh ka Group E jong ka Meghalaya State League da kaba pynliem ia ka Seinbhalang Shkentalang da 6-2 kol ha Wahiajer hynne ka sngi Balang.
U samla Kynsaibor Lhuid ula ioh thep haduh 3 kol ne hattrick da ka jingioh ban thep haduh ar kol ha ka kylla step bad shi kol ha ka kylla miet shuwa ban kut artad ka jingiakhun (18,37,90+5). Kiwei pat kiba ioh thep kol ki dei u Abhay Chettri ha ka minit ba 3 bad u Deibormame Tongper uba la ioh thep 2 kol (16 bad 20).
Hynrei ka Lajong kaba dei ka Champion ka MSL ha u 2019, kala shah thep haduh arkol ha ka Skhentalang lyngba u samla Rasmut ha ka minit ba 36 bad u Teibormi Tariang ha ka minit ba 71 tang ban ioh risa ki nongkyrshan.
Ha ka Group B, ka Sutnga kala wan beh na ka jingshah thep kol ban pynliem ia ka Riangdo Youth da 4-1 kol. U samla Batskhemlang Thongnirit jong ka Riangdo ula ioh thep ha ka minit kaba 3 shuwa ba ka Sutnga kan ioh pynphai lyngba u Skhemborlang Rupai ha ka minit ba 35, u Raplangki Lyngdoh (54), u Cheerfulness Shadap (77) bad u Deligent Pdang (90+4).
Ha ka Group A ha Tura, ka Lumsohkhlur kala pynliem ia ka Pinggera Dogisik da 2-1 kol. U samla Hellocomet Marbaniang ula ioh thep ia ka kol ba nyngkong ha ka minit ba 13 bad bud s aka kol u samla Richmond Nongsiej ha ka minit ba 44. Ka Pinggerra Dogisik kala ioh thep ha ka minit ba 37 lyngba u samla Rakanchekam R Marak.
Ha ka Group C, ka Tyrsad kala ioh ban pynlong ia ka jingialehkai ba nyngkong eh jong ka MSL ha ka thain bad ha kane ka jingialehkai, ka Ladthalaboh kala pynliem da 1-0 kol pyrshah ia ka Mawlum Tyrsad kaba la wan lyngba u samla Rangdajied Sayoo ha ka minit ba 20.
Sha Khliehriat pat, ha ka Group D, ka jingiakhun hapdeng ka Mulait United bad ka Iatyllilang Lumsehkot Raliang kala kut ha ka jingiakhaid ba khlem kol katba ha ka Group F, ka Pynursla kala pynliem da 2-0 kol pyrshah ia ka Patharkhmah ha Shillong. Ia kine ki kol la thep da u samla Riborlang Dkhar ha ka minit ba 44 bad 90.
Lashai ka sngi kan don tang kawei ka jingiakhun ka ban long hapdeng ka Mawtari Myrdon bad ka 7 Wasa Unit jong ka Group E ha Wahiajer. Ka jingialehkai kan sdang ha ka por 2 baje janmiet.
Ka Result ba hynne ka sngi
Group A (Tura): Pinggera Do’gisik 1 – 2 Lumsohkhlur
Group B (Mawkyrwat): Sutnga 4 – 1 Riangdo Youth
Group C (Tyrsad): Mawlum Tyrsad 0 – 1 Ladthadlaboh
Group D (Khliehriat): Mulait United 0 – 0 Iatyllilang Lumsehkot Raliang
Group E (Wahiajer): Shillong Lajong 6 – 2 Seinbhalang Shktentalang
Group F (Shillong): Pynursla United 2 – 0 Patharkhmah
