Shillong, Iaiong 15 : Ka Eastern West Khasi Hills District Cricket Association (EWKHDCA) kala ioh ia ka jingjop da 9 wicket pyrshah ia ka West Jaintia Hills District Cricket Association (WJHDA) ha ka jingiakhun ba nyngkong jong ka Zone-I ka MCA U-16 Inter-District Tournament 2025, kaba long ha Mukhla Mission, West Jaintia Hills hynne ka sngi Ba-ar.
Ka EWKHDCA ka dei ka District Cricket Association ba dang thymmai ka ban pyniasoh bad ka Meghalaya Cricket Association (MCA) bad kila pynjem khnap ia ki nongtied ka WJHDCA kaba la jied ban tied nyngkong hadien ba jop ia ka jingkynting pisa.
Kane ka rai kam shym la iarap satia ia kane ka kynhun ka WJH, kaba la shah pynhap lut ki wicket tang da ka jinglah kamai ba 30 runs ha ki 16 over. Ym don satia uwei ruh na ki nongtied ban ioh kamai palat ia ka 10 runs katba u nongkawang bol ka EWKH Dabetbhalang Kharjana (3/2 ha ki 3 over) bad Keeperwellson Sun (3/12 ha ka 6 over) kila shim 6 wicket hapdeng jong ki katba ia ki 4 ngut kiwei pat la pynhap wicket da ka jingrun out.
Ka EWKH kala hap tang shi wicket ha ka jingbeh ia ka thong khlem kano kano ka jingeh, Kila pyndep tang hapoh ka 11.2 over ban poi sha ka thong ha kaba u Dabetbhalang (16 run khlem out na ka 10 ball) ula thlieh ia ka six ban pynpoi ia ka kynhun sha ka thong.
Ka Shillong Cricket Association A kan iakynduh ia ka West Khasi Hills DCA ha ka jingiakhun ka ban long la sngi Balang ha ka por 8:30 baje mynstep.
