Shillong, Iaiong 05: Ka pule puthi ha ka jylla Meghalaya mynta u snem kala sakhi ia ka jingkiew bha ha ka jingpass bha ki khynnah ha ka School Leaving Certificate (SSLC) Examination 2025 kaba la pynlong da ka Meghalaya Board of School Education (MBOSE), ha kaba 341 tylli ki skul kila pass 100% ha kane ka eksam bad ka jingpass jong baroh ki khynnah kala kot sha ka 87.10%.
Kane ka jingpass bha ki khynnah kadei kaba heh bha haba ianujor bad ki snem kiba la leit ha kaba ki khynnah kiba la pass ka long tang 50% shaneng. Ha u snem 2024 ka jingpass ki khynnah ka long 55.80 % katba ha u snem 2023 ka jingpass ka long 51.93%, 56.96% ha u snem 2022 bad 52.90% ha u snem 2021.
Ia ka resol jong ka SSLC 2025 la pynbna hynne ka sngi Saitjain kaba long 2 bnai hashwa ia kaba ju pynbna ha ki snem kiba la dep, kata ha ka taiew kaba khatduh jong u bnai Jymmang ne ha ka taiew kaba nyngkong jong u bnai Jylliew. Kumban shu kdew ia ka resol ha u snem 2024 la pynbna haka 24 tarik u Jymmang, katba ha u snem 2023 ia ka resol la pynbna ha ka 26 tarik u Jymmang.
Ka MBOSE kala wanrah ia ka jingpynkylla bad naduh mynta u snem kan pynlong arsien ia ka eksam SSLC. Ka eksam kaba nyngkong kala long ha u bani Rymphang-Lber bad ia ka eksam ka baar yn pynlong ha u Iaiong-Jymmang da ka jingthmu ban ailad ia kito kiba khlem pass ha ka eksam ba kin ioh ia ka kabu ban iakhun biang ia ka eksam.
Ka jingthmu jong kane ka jingpynkylla ka long ban iarap ia ki khynnah pule ba kin ioh kloi ia ka resol khnang ba kin lah ban shim ia ka ‘Admission’ ne ban leit thep klas ha ki skul ne college khlem kano kano ka jingpynslem.
Kane ka jingpynkylla kadei ruh kaba iaid ryngkat bad ka jingiaid shakhmat ha ka jingpyntreikam ia ka National Education Policy (NEP) kaba la pynwandur ban kyrshan ia ki khynnah pule ban pynduna ia ka por hapdeng jong ka jingpyrshang ka jongki.
Ka Leisha Agarwal jong ka St. Margaret’s Higher Secondary School, Shillong bad ka Avila Kathrene P Lyngdoh jongka North Liberty Higher Secondary School, Jowai kila ioh bat lang ia ka kyrdan kaba nyngkong ha kane ka eksam kaba mynta u snem ha kaba kila ioh mar 582 marks.
Kila don 63,682 ngut ki khynnah pule kiba la ialeh ia ka eksamin SSLC mynta u snem bad kiba la pass ki don 55,473 ngut. Na kitei kiba pass, kila don 22,726 ngut ki shynrang bad 32,747 ki khynnah kynthei.
Nalor kane, kila don ruh 18,903 ngut ki khynnah pule kiba la pass ha baroh 5 tylli ki sobjek, katba 36,570 ngut ki khynnah pule kila pass ha baroh 6 tylli ki sobjek.
Ka kyrwoh na ka MBoSE kala ai khublei ba ka jingbha jong ka resol mynta u snem kadei namar ka jingtrei shitom bad jingaiti lut jong ki khynnah pule, ka rukom pynkylla thymmai ia ki jingkylli bad ka jingwanrah ia ka CM IMPACT Guidebook. Kane ka Guidebook kala pyni ia ka jinglong kongsan ka jongka khamtam na ka bynta ki khynnah ki bym ioh ia ka lad ban ioh ia ki jingthoh kiba biang ne ban pynkhreh bha ialade na ka bynta ka eksam.
 Examination 2025 kaba la pynlong da ka Meghalaya Board of School Education (MBOSE), ha kaba 341 tylli ki skul kila pass 100% ha kane ka eksam bad ka jingpass jong baroh ki khynnah kala kot sha ka 87.10%.){kind=link}