Nongpoh, Jymmang 04: Ka Synjuk ki Rangbah Shnong Ri-Bhoi District hynne ka sngi Thohdieng, kala leit dawa markhmat iau Chief Executive Member (CEM) ka Khasi Hills Autonomous District Council (KHADC) Bah Titosstarwell Chyne ban pyn kylla ia ka hukum ba khang ia ki Rangbah Shnong ban iashimbynta ha ki kam sain hima sima.
Nalor kane, ka Synjuk kala dawa ruh ia ka KHADC kala pynsngew ruh halor ka jingrem ka bai register ia ki jaka puta bad ka jingbym ithuh jong ki Bank ia ki dulit bala register hapoh ka Council.
Haba iakren bad ki lad pathai khubor hadien ka jingiakynduh ia u CEM, u General Secretary ka Synjuk Bah PB Sylliang haka jingdonlang u Chairman Bah BB Makdoh u la ong ba kum ka Synjuk kala pynpaw ka jingsngewkhia hadien ka jingpynmih hukum jong ka District Council ban khanglad ïaki Rangbah Shnong ban shim bynta haka kam saiñ hima sima, namar kum ka District Council ka dei ban sngewthuh katkum ka jingïaid jong ka por ba ki Rangbah Shnong kim lah ban iaid lait ia ka kam sain hima sima ban wanrah ïaka roi ka paw haka shnong ka thaw.
U la ong ruh ba hadien ka jingïakren sngewthuh, u Bah Titos Chyne u la pynpaw ba ïa mynta kam don kano kano ka jingkhanglad ïaki Rangbah Shnong hynrei kum u CEM unsa buddien ïa katei ka kam namar ka don ruh ka aiñ jong ka Hima Mylliem kaba khanglad ïaki Rangbah Shnong ban shim bynta haka kam saiñ Hima”
“Kum ki nongïalam shnong ngi la pynpaw ba kala dei ka por ban pynthymmai ïaka aiñ jong ka Hima Mylliem katkum ka jingïaid jong ka por, watla ki Rangbah Shnong ki don bynta haka kam saiñ Hima hynrei kim don pat ka hok ban pynbor ïaki paidbah nongshong shnong ban jied ïaki nongmihkhmat, namar ka rai bad ka hok ban jied ïaki nongmihkhmat ka dei ka mon ka laitluid jong ki paidbah” ula ong.
Halor ka jingrem ka bai register khyndew, u pyntip ba u CEM u la pynshai ba ka District Council kala shna ruh ïaka Land Bill ha kaba ki shnong kiba hap hapoh ka KHADC kila lah ban register ïaki jaka jong ki sha District Council bad kino kino ki Bank ki la lah ban ithuh ïa ka syrnod bala ai da ka District Council lada ki kwah ban shim ram naki bank.
Ka Synjuk kala pynsngew ruh hakhmat u CEM halor ka jingkam Rangbah Shnong da ki jaitbynriew Garo haka thaiñ Raid Marwet kaba la paw ruh na ki jingujor da ki nongshong shnong ka thaiñ Raid Marwet halor ka jingjied Rangbah Shnong da u Garo ha katei ka thaiñ.
Halor kane, u CEM u pyntip ba ka District Council ka dang buddien ruh ïa katei ka kam bad naka liang ka ka Synjuk ruh kan sa phah da ka jingthoh halor katei ka bynta.
