Guwahati, Naitung 09: Ki dkhot ka tnat Vigilance bad Anti-Corruption wing jong ki pulit Assam ki la kem noh ia uwei u heh sorkar ka tnat Metrology ha Guwahati namar ka jingdonkti ha ka kam bamsap.
U Shashindra Nath Baishya, Controller jong ka Assam Legal Metrology Service u la shah kem markhmat katba u dang pdiang ia ka pisa bam sap ka ba T.20,000 hynnin ka sngi Thohdieng na ka bynta ban pynioh laisen ia u nong ujor u ba kwah ban plie dukan die tiar thew jingthew.
U Baishya kham hashwa u la dawa T.25,000 na ka bynta ban pynioh laisen na une u nong ujor u bym shym la kwah ban siew ia kane ka pisa da ka ba leit mih ruh sha ka tnat Vigilance bad Anti-Corruption Directorate ba kan shim ka jingpynshitom pyrshah ia utei u heh sorkar.
“U Baishya u la shah kem markhmat hapoh ka ophis treikam jong u khyndiat por hadien ba u la shim ia ka pisa ka ba u la dawa T.20,000 na u nong ujor. Hadien ba la pynlong shuh shuh ka jingkhynra, la ioh ban kurup sa T. 3,23,850 na kane ka ophis jong u da ka tnat iakhun bamsap,” ong u heh kane ka tnat.
U Baishya u dei u heh sorkar u ba saw ka sorkar Assam u ban shah kem markhmat katba u dang leh ia ka kam bamsap naduh ka 20 tarik u bnai Jymmang ba la dep.
Ha ka 20 tarik u Jymmang ba la dep, ki heh jong ka tnat Vigilance bad Anti-Corruption ki la kem noh ia u Executive Engineer, u Akbar Ali bad ia u Head Assistant jong ka tnat Irrigation u Jagadish Rabha ha Goalpara ha ka por ba ki dang shim ia ka pisa bamsap ka ba T. 50,000.
U Ali bad u Rabha ki la dawa T.80,000 na u nong ujor na ka bynta ban pynioh ia u ia ka jingtrei ka ba T.10 lak na ka bynta ban maramot halor ki jingshah pynjulor na ka jingshlei um.
Ha ka 15 tarik u Jylliew ba la dep, u Madan Singha u ba dei u accountant ophisar ba la rim hapoh ka ophis ha treasury ha Cachar ka Silchar u la shah kem markhamt katba u dang pdiang ia ka pisa bam sap ka ba T.10,000 hadien ka jingpynap shrip da ki dkhot jong katei ka kynhun.
