Imphal, Jymmang 28: Ka kynhun ki Nongialam Congress na Manipur kin sa iakynduh ia ka President ka Ri ka Droupadi Murmu ban pyntip sha ka halor ka jinglong jingman ka suk ka sain hapoh ka Jylla.
U Myntri Rangbah barim Okram Ibobi Singh u pyntip ba ki Nongialam ka Party ba kynthup ia u Gaikhangam bad Th Lokeshwor kila don ha New Delhi ban pan por iakynduh bad ka President ka Ri.
Haba iakren bad ki nongthoh khubor ha Imphal, ula ong “Ki Nongialam ha Delki kin jin da leh bymsuidniew lada ia kaei kaba jia ha Manipur ka leit jia ha kiwei pat ki Jylla kiba heh.
Wat u Myntri Rangbah Duh Narendra Modi uba la pynbunkam ialade da ki kam bapher bapher, ula dep ban phah ia ki Nongmihkhmat sha Imphal hadien ka jingjia ba 3 tark Jymmang”.
Ha kajuh ka por, ka kynhun ki Kynthei kila pynlong ia ka jingiashong kyllain mungor ha kumba 30 tylli ki jaka ha kylleng ka Imphal ban dawa ha kaban pynbeit noh ia kiei kiei baroh kiba jia hapoh ka Jylla.
Ha ka sngi Saitjain u Home Commissioner ka Manipur H Gyan Pradesh ula pynmih ia ka jingpynbna ba nang pynjlan ia ka jingtrei ka kor Internet tad haduh ka 31 tarik Jymmang kaba la pynshong nongrim na ki jingpyntip u Director General of Police (DGP).
