Imphal, Naiwieng 28 : Ka United National Liberation Front (UNLF) ba ialam da u Kh Pambei kala rai ban iasoi noh da ka soskular sangeh iasiat bad ka Sorkar India
Kane ka kynhun kala pyntip ruh ba kala pynkhreh ban leit sha ka miej jingiakren halor ka jingkiengatiar ban lah pynioh pat ia ka jinglong laitluid ka Manipur.
U General Secretary ka UNLF (Pambei) Ch Thanil ha ka sngi Thohdieng u pyntip ba ka Kynhun kan sa iasoi noh shen ia ka soskular sangeh iasiat bad ban shong iakren bad ka Sorkar India.
Haba kren ha ka jingrakhe dap 59 snem jong ka UNLF bad ka jingplie ia ka ktem thymmai ha Kakching Khunou myn ha ka 25 tarik Naiwieng, u Thanil ula ong ba ia kane ka sienjam lah ban khein kum ka jingiakren iasuk bad ka UNLF shen kan sa iashong bad ki bor ka Sorkar India.
U Thanil ula pynkut noh ruh ia ka jingartatien ha ka jingmut jingpyrkhat ki paidbah ka Manipur kiba mut ba kaei kaba ka UNLF (Pampei) ka mut leh, ba kam dei satia ka jingpyndem kumba la pynsaphriang khubor da mano re.
Ula pyntip ba kane ka lynti sha ka jingiakren iasuk kala poi ha une u pud hadien ba ki Nongialam kila ioh ia ka jingphah ktien na New Delhi.
