Imphal, Rymphang 18 : U Myntri Rangbah ka Manipur N Biren Singh ha ka sngi Saitjain ula ong ba haba phai hi sha ka jingbuh ia ki bor pahara hapoh ka Jylla, ym shym la don satia ki ‘buffer zone’ hapoh ka Jylla.
U Myntri Rangba ula kynthoh ia kane halor ka ka jingkulmar kaba mih biang ha Churachandpur ha kaba ki paidbah kila leit ban thombor ia ka Ophis u SP bad lam sha ka jingther kuli kaba shim ia arngut ki mynsiem briew bad pynmynsaw ia bun ngut.
Haba kren sha ki nongthoh khubor ha Imphal, U Biren Singh ula ong “Ki don katto katne ki jaka ba jur ka jingumsnam ia kaba la buh ia ki bor pahara hynrei kam ju don kata ka buffer zone”.
Kane ka jingkren u Biren Singh ka long kongsan bha khamtam haba mih ka khubor ba ma MHA ha kala pynkha ia ki buffer one hapdeng ki jaka jong ki Meitei bad ki Kuki ban khanglad ia ka jingnang pur ka jingia umsnam.
U Biren Singh u pyntip ba hynniew ngut ki pulit kila shah sospon haba iadei bad ka jingshah tuh ki tiar siat ha Chingarel bad kdew ruh halor ka jingsospon ba dang shen ia u Pulit uba pyni dur bad video lem bad ki kynhun kaikhlaw ha Churachandpur District.
Kane ka jingsospon kala pynmih ia ka jingkulmar kaba jur hapoh ka thain.
“Balei ba ki nongiakhih kila wiangding ia ka Ophis u District Magistrate?. Kila iakhih pyrshah ia u Khliehduh ki Pulit. Ka paw kumba don eiei ha lyndet” suba u Biren Singh.
