Shillong, Rymphang 18 : Ka video kala saphriang paidbah ba pyni ia ki nongtuh kiba pynbud ia ki phlim Hollywood ban tuh mar na ka kali kaba dang iaid ha surok ka thain Umiam, Ri-Bhoi District.
Ha kane ka video, la iohi ia 4 ngut ki briew ki dang tuh mar na kawei ka mini trok kaba dang iaid ha Highway ka thain Umiam.
Na ka video la sakhi ba arngut ki briew kila kiew ha kane ka kali ba dang iaid bad tuh ia ki mar bala suba dei u piat bad u phan bad kila thep ha ka pla iew kaba ki kieng katba arngut pat kila bud ia kane ka mini trok da ki artylli ki scooty NTorg, kiba don ia u nombor Meghalaya.
Hashuwa ban poi ha Jingkieng Umiam, kaba dang iaid ka jingmaramot, uwei na kine ki nongtuh ula kynthih na ka kali namar ka jingdon jongki Pulit ha kane ka Jingkieng.
Hynrei, uwei pat ula sahkut ha ka kali namar ka jingbym nud kynthih bad la synran ia u da kawei pat ka scooty ban pynthikna ba un ioh kynthih bad phet krad lang.
