Imphal, Naitung 2 : Ka United People’s Front (UPF) bad ka Kuki National Organisation (KNO) kila rai ban weng noh ia ka pakhang surok ha ka NH-2 ba hap ha Kangai (Kangpokpi).
Ha ka kyrwoh bala iapyllait lang hynne ka sngi U Blei, u Nongaiktien ka UPF Aaron Kipgen ula ong “ Wat hapdeng ka jingbitar bad jingthrang jong ki paid Kuki Zo, haba buh hakhmat ia ka jingsngewkhia jong u Myntri kam Pohiing Amit Shah ban wanrah noh ia ka jingshongsuk shongsain ha Jylla bad weng noh ia ki jingeh ki paidbah, ka UPF bad KNP kila rai ban weng noh ia ka phang surok ha Kangai naduh mynta ban pynthikna ba kan nym pynthut ia ka jingwan ki marbam mardih sha Jylla. Ia kane ka rai la shim hadien ka jingiasyllok bad ki Sengbhalang, ki Khlieh Nongialam Shnong, ki nongialam samla bad longkmie ha kiba bun ki jingiakynduh”.
Hynrei ula ban jur ba ka jingiakynad ba dang iaid mynta ha Manipur kala ktah jur ia ka jingiasuk hapdeng ki jaidbynriew kiba shong ba sah hapoh ka Jylla.
U Seilen Haokip, Nongaiktien ka KNO ula ong “Ka seng Kuki Zo kala dep iakynduh ia u Myntri kam Pohiing ka Ri bad kyrpad ia u ban ai pahara ia ki shnong ha khappud kiba don jingma naka jingshah hiar thma. Ngi ai khublei ia ki bor shipai kiba la don ha kiba bun ki jaka kumba la kular bad ki kam ki jam ki dang iaid shakhmat”.
Shisien ba ki bor shipai kila don lut ha man ki jaka ba don jingma, ula ong baka Seng kan pynthikna ba ki Volunteer jong ka, kin weng noh ialade na kine ki jaka ban iarap ha ka ban wanrah pat ia jingshongsuk shongsain.
Ula ong ruh “La khmih lynti ba ki bor khmih kin shim ia baroh ki sienjam ban pynneh ia ka jingsuk bad pynthikna ba ki mar bam mardih kin poi sha ki briew kiba donkam, khamtam ha ki Hills District. Ngi shim ruh ia ka kabu ban kyrpad ia baroh ki seng bad paidbah ba kwah jingsuk ka Jylla ba kin shim lang ia ka sienjam ha kaban wanrah ia ka jingsuk ha Jylla”.
Lah ban kdew hangne ba ka Manipur kala sakhi ia ka thma iapher jaidbynriew hapdeng ki Meitei bad ki Kuki Zo naduh ka 3 tarik u Jymmang 2023.
Pule lang ia kane: Manipur: Siat iap ki kaikhlaw ia 3 ngut ki VDF ha Khujuma Tabi
