Imphal, Naitung 27: U Myntri Rangbah ka Manipur N. Biren Singh ha ka sngi Balang ula pynrem jur ia ka European Parliament halor ka jingiakren ia ki kam iaumsnam pher jaidbynriew ha Manipur haba kyntu ruh ia baroh ki Jylla ka thain Shatei Lam Mihngi ba kin ym tuklar satia ia ki kam pohiing jong ka Jylla.
U Biren Singh haba kren ha ka jingrakhe ia ka Kargil Vijay Diwas, ula ong ba ka kam iaumsnam ha Manipur ka dei ka plan jong ki bor nongwei kiba kwah ban dakhol ia u pud u sam ka Jylla da kaba leh mynleh ialade kum ki lanot.
“Ka daw tynrai hi ka dei ka jingratdyngkhong ia ki kam khaii droks beain, ka jingrep syntiew poppy beain, ka jingpyrshang ban knieh ia ka bor kaba la pyndonkam ban pyniapait iapra ia ka jingiatylli kawei jong ka Jylla. Ka Sorkar kam don eiei pyrshah ia ki para shynrang bad kynthei jong ka Jaidbynriew Kuki” ong u Myntri Rangbah.
Haba kren halor ka jingkynthoh u Myntri Rangbah ka Mizoram Zorathanga, u Biren Singh ula ong ba ka Mizoram hadien ka jingiaksaid kaba slem bha,kala ioh iala ka jong ka Jylla da kaba phiah na ka Assam. “Hynrei, ka Manipur kala dei ka Ri la 2000 snem, kum ka ri kaba laitluid. Ngi la mad ia shibun ki nongshun na Burma, China bad ngi la iengskhem beit triang. Ngim dei ban klet bad u Zoramthanga ruh um dei ban klet ia kane. U lah ban pynpaw ia ka jingsngewslem bad leit sha ka rally” ula ong.
U Zoramthanga ha ryngkat ki Myntri Sorkar bad ki MLA ka Mizo National Front ha ka sngi Ba-ar, kila iashimbynta ha ka ‘Solidarity march’ bala pynlong da ka NGO Coordinational Committee ha Mizoram ban pynpaw ia ka jingsngewlem ia ka jingshah thombor ki riewlum Kuki-Zo ha Manipur.
U Myntri Rangbah ka Manipur ula ong ba ka jingjia ba jia mynta kam dei satia ka jingiakynad hapdeng ki Hindu bad Khristan bad ki don bun ki Iingmane ki bym shym la shah ktah ha Manipur.
Haba kynthoh ia ka European Parliament, u Biren Singh khlem da jer kyrteng iano iano ruh, ula ong ba kila ia iam, shna khana thok bad kan ialade kum ki lanot bad wanrah ruh ia kane ka ishu hapoh ka European Parliament.
“Kaban mih hi kan ym long kaba bha. Wat ki ri ka Europe, kin tip aiu halor ka daw tynrai?. Ki tip aiu halor ka Manipur?. Kila pynjot ia ka India, kila pynjot ia ka Jylla jong ngi, kila pyniap bad lute ia ka jingdon jingem jong ngi. Ka rukom pyrkhat ba tang kito kiba nang kren phareng ki dei kiba stad ka dei kaba hap pynrem jur bha” ula ong.
Halor ka jiigdawa ban phiah noh la ka jong ka Jylla bad ka bor synshar khaddar, u Biren Singh ula ong ba un ym pyndep satia ha kino kino ki jingbyrngem ne ki jingtynjuh bad un ym ailadruh ban phah la ka jongka synshar khaddar “Em katba ka snam ka dang iaid ha ki thied jong nga”.
Ula kular ba ka Sorkar kan ym shongthait tad haduh kala lah ban pynithuh ia ki poiwir bad leh eiei pyrshah ia ki.
