Shillong Naitung 26: Ka sorkar jylla kala phah da ka jingthoh sha ka North Eastern Hill University (NEHU) ban pyntip ba kiba bun hi ki college ha ka jylla kim pat long kiba kloi ban pyntreikam iaka National Education Policy (NEP) kaba thymmai ha une u snem ba mynta.
Ia kane la pyntip da u Myntri ka pule puthi u Rakkam A Sangma hadien ka jingiakynduh ia ki nongialam jongka NEHU Students Union hynne ka sngi Balang.
U Rakkam ula iathuh ba ka sorkar jylla kala iohpdiang ia ki shithi na ki 43 tylli ki college ha kaba 33 tylli ki college kila pynpaw ba kim pat long kiba kloi ban pyntreikam iaka NEP mynta u snem. Halor kane, na ka liang ka sorkar kala phah iaka shithi 3 sien sha u Vice Chancellor ka NEHU kata ha ka 17 tarik u Jymmang, 27 tarik u Jylliew bad 25 tarik u Naitung.
“Ngi lah dep pyntip sha ka NEHU ba ki jaka pule kim pat kloi ban pyntreikam iaka NEP ha une u snem ba mynta bad kiba bun ki jaka pule kila kyrpad ban pynkynriah shwa iaka jingpyntreikam ha u snem ban wan” ong u Myntri Sorkar bad ka iathuh ba ki katto katne ki College kiba paw haka jylla kila rai ban pyntreikam noh iaka NEP mynta u snem.
“Ngi lah ong ia u VC ka NEHU ban iakren bad ki khlieh jong ki jaka pule bad hadien katei ka jingiatai, ka skulbah kala pynmih ia ka jingai jingmut bad pyntip iaka sorkar jylla ba ki don ki bynta jong ka kyndon ban pyntreikam shwa tang ia kiba la kloi (hybrid mode”. Kane ka mut ba kino kino ki jaka pule kiba kwah ban pyntreikam iaka NEP ki lah ban iaid shakhmat, katba kito ki bym pat long kiba kloi, ki lah ban pynkynriah shwa ia ka jingpyntreikam iaka NEP ha u snem ban wan” ong u Rakkam Sangma.
U Myntri ula pynshai ruh ba ki jaka pule lada kim treh ban pyntreikam mynta u snem iaka NEP, kumta ki samla pule kiba don jingthmu ban bteng shuh shuh iaka jingpule ha ki kyrdan bapher, yn ym lah ban pdiang ne ioh jaka pule ha kiwei pat ki jylla kiba don hapoh ka ri.
