Imphal, Jymmang 29 : Ka The Indigenous Tribal Leaders Forum (ITLF) hynne ka sngi Nyngkong, kala ther tyngeh ia u Myntri Rangbah ka Jylla N Biren Singh ba kynnoh ia ki kaikhlaw Kuki halor ki kam iaumsnam hapoh Manipur.
Haba iakren bad ki nongthoh khubor, u Nongaiktien ka ITLF Ginza Vualjong, ula ong ‘Dang shen u Myntri Rangbah N Biren Singh ula kam ba 33 ngut ki kaikhlaw Kuki kila kyllon iap ha ka jingiather kuli. Ngi kwah ban pynshai ba ym don satia u kaikhlaw Kuki ban iap. Baroh ki ehrang kila don hala ka ktem bala buh da ka Sorkar…ki don ha ka jingiateh soskular SOO bad kim shym la iashimbynta ha ka jingialeh. Kito kiba ialeh ki dei ki nongshongshnong, ngi khot ia ki ki Village Defender Volunteers”.
Ula kam ba palat 500 tylli ki Shnong kila shah wiang ding bad palat 100 ngut ki briew kila iap bad 250 tylli ki Iingmane kila shah pynjulor. Ula ong ba ka dei ka kamram jong ki Nongshongshnong ba kin iada ia kiwei pat ki Shnong ba dang sah, ia kaba kila leh ia kane da ki suloi ba kila ioh licence namar ka jingsheptieng ioh ki shah hiar thma.
“Ngi iatip ba ka jinghiar thma kala wan na ki kynhun kaikhlaw Meitei kiba phong ia ki uniform pulit. Kala shai kdar ba ki kaikhlaw Meitei ki donkti ha ka jinghiar thma. Ka jingkynnoh jong u Myntri Rangbah N Biren Singh ba dei ki kaikhlaw Kuki kiba hiarthma ka dei ka bym don nongrim satia” ula kynnoh.
Ula ong ba ki Nongshongshnong ki khlem pyni bor hynrei kila iada ialade na ki briew kiba wan ban thombor ia ki.
“Ki paid Meitei kila wan haduh 30 tylli ki trok ryngkat ki tiar siat. Ngim don lynti pat da kumwei. Ngi hap ban iada ialade na ki nongwei. Nga kwah ban pynshai ba ngim ju hiar thma iano iano ruh, hynrei lada don kiba hiar thma ia ngi, ngi hap ban iada ialade” ong u Vualjong.
