Imphal, Naiwieng 26 : Ka National Investigation Agency (NIA) kala shimti ban pynlong ia ka jingtohkit halor ka jingshah pyniap dusmon ki kynthei bad ki khynnah dang shen ha Jiribam, Manipur.
Kane ka jingtohkit kala sdang halor ka jingbthah jong ka Ministry of Home Affairs (MHA) ban kem mardor ia ki briew kiba donkti ha ki lai tylli ki jingjia pyntriem ne kam umsnam ha Manipur.
Kane ka kynhun tohkit kam kaikhlaw kala register thymmai ia lai tylli ki case ne jingjia ha ka 13 tarik Naiwieng, hadien ba ka MHA kala aiti ia ka jingtohkit sha ka Agency haba bishar ia ki kam ba shyrkhei, kaba la jia hapdeng ka jingkhie ka kam umsnam ha kane ka Jylla bad la leh ruh ia kane da ka jingthmu ban sei pyrthei ia ki jingsuhbuit baroh ha lyndet kane ka kam pyntriem.
Ha ka case ba nyngkong (FIR No. 29(11) Borobekra PS, ba 11th Naiwieng 2024), bun tylli ki Iing kila shah thang bad arngut ki nongshongshnong kila shah pyniap ha Borobekra. Hadien ki kynhun kaikhlaw ki bym lah ban tip, kila rahbor bad pyniap klep ia 6 ngut kibrew kynthup ia 3 ngut ki kynthei bad 3 ngut ki Khynnah.
Kane ka jingjia kala jia ha ka 11 tarik Naiwieng kaba la jia ruh hadien ba ki kynhun kaikhlaw kila ther kuli iaka Borobekra Police Station bad ruh ia ki katto katne ki iing bad ki dukan kibadon ha Jakuradhor Karong bad hadien kila wiang ding ia ki.
Ka jingiather kuli kaba shyrkhei kala mih hapdeng kine ki kynhun kaikhlaw lem bad ki Pulit bad ki CRPF ka Borobekra Police Station bad hadien ka jingkhynra, la lap pat ia ar tylli ki metiap ha kine ki iing ba shah wiang ding.
Ka case kaba ar ka dei kaba jia ha ka 11 tarik Naiwieng halor ka jingshah hiar thma ka ktem ki CRPF kaba don ha Jakuradhor Karong bad ka Borobekra Police Station, Jiribam. Uwei u CRPF langrut ula mynsaw na ka jingshei kuli ha ka jingshah hiar thma bad la pynkut ia u sha Silchar ban ioh jingsumar. Ha ka jingkhynra, ki Pulit kila ioh tam ia ki metiap jong ki kynhun kaikhlaw bym lah ban ithuh ha ryngkat ki tiar siat.
Ka case kaba lai ka iadei bad ka jingshah pyniap kawei ka kynthei ha Jiribam ha ki kynhun kaikhlaw. Kane ka jingjia kala jia ha ka 7 tarik Naiwieng haba kane ka kynthei ba 31 snem, ka Zosangkim, kurim u Ngurthansang ba na Jairolpokpi, Jiribam, kaba dei ruh ka kmie ki lai ngut ki khun, kala shah leh beijot dusmon bad shah thang im hala ka jong ka iingsah ha kine ki kynhun kaikhlaw.
Ka kynhun ka NIA kala hiar tohkit sha kine ki jaka ha ka 21 bad 22 tarik Naiwieng. Ki Pulit mynta ki dang pynkhreh ban aiti noh ia ki kot ki sla sha ka NIA.
