Shillong Naiwieng 26: Ka State Youth Wing jong ka Khun Hynniewtrep National Awakening Movement (KHNAM) ha ka sngi Ba-ar kala dawa ia ka sorkar jylla ban siew pyndep noh mardor ia ka tulop jong ki Home Guard Volunteers, kiba don ha ka kam pyniaid kali.
Ha ka shithi kaba la phah sha u Symbud Myntri Rangbah ka jylla uba khmih ia ka tnad kam pohiing u Bah Prestone Tynsong, u President ka KHNAM State Youth Wing u Bah J Pyngrope ula kynnoh ba ki Home Guard kiba don ha ka kam ban pyniaid ia ki kali ha sor Shillong bad ha khapsor kim shym la ioh ia ka tulop ka jongki mynta la bun bnai.
“Kila pynpaw ba ki nongtrei ki bym shim la ioh ia ka tulop kila hap ban iaid ia ki jingeh ha ka jingpyrshang ban pynbiang ia ki jingdonkam kiba man la ka sngi ha ka iing ka sem jongki. Ngi lah iakynduh ia ki bor pyniaid jong ki Homeguard bad ki Pulit Traffic halor katei ka mat bad la ioh jingtip ba ka jingpynslem ha kaban pyllait ia ka pisa kadei na ka liang jong ka sorkar jylla” ula ong.
“Kumta ngi kyrpad ia ka ophis ka jong phi ban shimkhia halor kane ban pynthikna ba ka tulop kaba dang sahteng ban siew sha kitei ki Volunteer dei ban siew pyndep noh mardor bad ban siew lut baroh, khnang ba ki bahaiing bahasem kin ioh ban rakhe iaka Khrismas da ka jingkmen bad jingsngewbha” ula pynpaw.
U Bah Pyngrope ula kyntu ruh ba ha ki snem ban wan, dei ban siew man la ka bnai ia ka tulop ka jongki khnang ba kan ym ktah ia ka jingiaid beit iaid ryntih jong ka iing ka sem.
“Ngi lah ioh jingtip ruh ba ka jingpynrungkam ia ki Home guard kam shym la long ha ka lynti kaba dei, ha kaba ym shim la ai satia ia kano kano ka jingthoh jong ka jingthungkam ia ki” ula bynrap.
