Imphal, Jylliew 16: Ki don 9 ngut ki suba kaikhlaw, ba kynthup ia kawei ka dkhot kynthei kiba la shah kem, ha ka jingkhynra pyrshah ia ki kaikhlaw, kaba la pynlong ha kylleng ki jaka jong ka Imphal Valley jong ka Manipur, ha ki 36 kynta ba ladep.
Kine ki briew kiba la shah kem ki dei kiba don jingiadei bad ki katto katne ki seng kaikhlaw ba la khang pyrshah, kynthup ia ki seng kaikhlaw Revolutionary People Front (RPF), People’s Liberation Army (PLA), National Revolutionary Front Manipur (NRFM), United National Liberation Front (UNLF), Kangleipak Communist United Revolution (FKCPR).La iathuh ba katto katne ngut na kiba la shah kem, ki dei kiba donkti ha ki kam dawa pisa ha ki jaka bapher bapher jong katei ka jaka them.
Katkum ki pulit, la lap ruh ia ka jaka buh tiar, ki kuli bad kiwei kiwei ki tiar kiba lah ban pynngat ha ki kam runar ha ka por ba pynlong ia ka jingkhynra.
Ha kajuh ka por, ki bor pahara ki la pynlong ia ka jingthwet briew kaba jur ha Manipur ban ioh kem ia baroh ki dkhot jong ki seng kaikhlaw.
“Ngi la pynlong ia ka jingkhynra kaba jur pyrshah ia ki seng kaikhlaw kiba treikam ha ka jylla.Haduh mynta, ngi la kem ia kiba bun ki dkhot jong ki seng kaikhlaw bapher bapher bad ngi la kurup ia ki tiar ialeh bad ki kuli na ki kti jong ki,” la ong uwei u heh pulit.
Palat 270 ngut ki briew ki la duh noh ri ïa la ka jong ka jingim, bad palat 62,000 ngut ki la shah pynkynriah jaka na ka jingïakynad jaitbynriew ha Manipur haduh mynta.
