Shillong, Jylliew 16: Ki samla pule naka jaidbynriew Hajong hynne ka sngi kila dawa naki bor Pulit bad Sorkar ban pynlong ka jingtohkit kaba bniah bad kaba khlem shah liang halor ka jinglap iaka metiap jong ki shijur na kawei ka sem ap kali ha Lumsohphoh, Nongthymmai Shillong.
Hashuwa kane ki samla pule ka jaidbynriew Hajong lem bad kiwei ki riew paidbah kila ialumlang ha Khyndai Lad ban thang mombati kum shi bynta ban sngewlem halor ka jingkhlad noh ki shijur kiba dei naka jaidbynriew Hajong.
Lah ban kdew ba haka step 14 tarik Jylliew ki riew paidbah kila lap iaki met iap jong ki shijur ha kawei ka dukan kwai dong kaba don haka surokbah ban leit sha Nongthymmai.
Kine ki shijur kidei kiba la ithuh kyrteng kum ka Pronome Hajong (22 snem ka rta) na Balat East Khasi Hills bad u Simanta Hajong (21 snem ka rta) na Ranikor South West Khasi Hills.
Ka Samla Joti kala ong ba watla ki Pulit ki kdew ba dei namar ka jing phasi hynrei ka rukom lap iaki metiap ka long kaba sngewphylla bad kaba buh dak jingkylli. “Namar kata ngi dawa naki Pulit bad naka Sorkar ban shimkhia halor kane khnang baka jingtohkit kan long kaba khuid bad ka bym shah liang” kala ong.
Haba phah iaka khubor sngewlem shaki longiing, ka samla Joti kala ong “Nga don hangne ym tang kum ka President hynrei kum ka hynmen jong ki samla bala duh noh iala ka jingim, ngi don hangne naki jaidbynriew bapher bapher bad ngi don hangne ban sngewlem bad kynmaw ia kito kiba la duh noh iala ka jingim”.
