Imphal, Nohprah 07 : Ki kynhun seng jong ki paid Kuki-Zo ka Manipur kiba sah ha Kangpokpi kila shadkmen ia ka jingjop jong ka Zoram People’s Movement (ZPM) bad u Nongialam Lalduhoma ha ka elekshon Assembly ka Mizoram.
Haba ai khublei ia u Nongialam ka ZPM bad ia ka Party halor ka jingioh ia ka jingjop ka ban sah jingkynmaw, ka Kangpokpi Town Committee, ka Kangpokpi Women Welfare Organization bad ka Kangpokpi Youth Union, kila pynlong ia ka jingialehkmen ha ka Ophis jong ka Town Committee hynne ka sngi Palei.
Kine ki Kynhun ka Jaidbynriew Kuki-Zo ka Kangpokpi kila ai khublei ruh ia ki paidbah ka Mizoram kiba la trei shitom ban wanrah ia ka Sorkar u Paidbah ha Mizoram.
Kine ki kynhun kila kyrkhu bad kitbok ruh ia u nongialam ka ZPM bad ki MLA ka party bad duwai ba ka Sorkar ba thymmai ka Mizoram hapoh ka jingialam u Lakduoma kan long ka jingkyrkhu ia baroh ki jaidbynriew Kuki-Zo.
Nalor kane, kila kitbok ruh ia u Nongialam ba un ioh ia ka koit ka khiah bad ka jingstad ban thaw bad ialam ia ka Sorkar ba thymmai ka ban long ka nongap langbrot ba bha ia ki jaidbynriew Kuki-Zo.
