Imphal, Iaiong 19: Ka jylla Manipur kaba dang don mynta hapdeng ka jingsynshar President Rule, kala pynlong ia ka jingwad bniah ban pynshisha ia ki riew paidbah kiba don ia ki licence suloi hapoh ka jylla bad kumjuh ruh ban wad jingtip ia ka jingdon tiar siat jong ki riew shimet.
Katkum ka jingbthah kaba la ai sha baroh 16 ngut ki Deputy Commissioners, ka tnad kam poh iing kala bthah ia ki bor pyniaid district ba kin eksamin bha ia ka jingkut por ki kot ki sla bad man la ka district la bthah ba kin shim ia ki licence original, ki dealer registers bad ha kaba iadei bad ki kot ki sla sha ki police stations ba jan tam hapoh ka 25 tarik mynta u bnai Iaiong.
Shuh shuh ki heh ophisar kila pynpaw ba kane ka jingthmu ka long ban pynshisha ia ka jinglong trai la ki iahap ne em bad ki jinglum thup jong ka sorkar ha kaba iadei bad kine ki tiar siat.
Ia ki Deputy Commissioners la dep ban bthah ba kin lum jingtip man la ki district bad kumjuh ruh ban leh ia ka kaiphod bad hadien pat ban pynshisha bad hadien ba la dep dei ban phah ia ki sha ka tnad kam poh iing jong ka jylla.
