Imphal, Risaw 06 : Ki 10 tylli ki seng sain pyrthei ba ialam da ka Congress ha Manipur, kila pynrem jur ia ka Sorkar ar engine jong ka BJP namar ka jingbym lah satia ban wanrah pat ia ka jingshongsuk bad jingjai jai ha Manipur.
Ha ka sngi Palei, kine ki 10 tylli ki seng sain pyrthei kila iashong jingialang ha Manipur ha kaba kila pynrem jur ia ka Sorkar NDA ba ialam da ka BJP ba kam shym lah ban tehlakam ia ka jingshongsuk ha Manipur.
Ka Jylla kala pluh da ki kam iaumsnam naduh ka 3 tarik Jymmang, 2023 namar ka jingsngew iapher jaidbynriew hapdeng ki Meitei kiba heh paid bad ki Kuki kiba dei ki riewlum.
U Mynyri Rangbah barim ka Manipur Okram Obobi Singh ula ong ba ka jingbym shimkhia jong baroh artylli ki Sorkar-ka Sorkar Pdeng bad Sorkar Jylla, kala lam sha ka jingbym lah ban wanrah pat ia ka jingsuk bad jingjai jai ha kane ka Jylla.
“U Myntri Rangbah Duh Narendra Modi ula sngar jar jar halor ka jingjia Manipur haduh mynta bad ka long kaba sngewsih bad kaba hap pynrem jur bha” ong u Singh.
U Singh ula ong ba ki paidbah kim pat shai hok la ka Article 355 kala treikam ha ka Jylla ne em.
“Hato ka Manipur ka dei kaba synshar da ka Sorkar Pdeng ne da ki Nongmihkhmat bala jied u paidbah jong ka Sorkar Jylla” ula buh jingkylli.
Ban wanrah ia ka lynti iapynbeit ba jai jai halor kane ka thma iapher jaidbynriew, ki 10 seng kila pynskhem iala ka nongrim ba kin iatreilang beit tad haduh ba ka jingsuk kala wan phai pat bad ban pynlong ruh ia ki jingiakhih ba jai jai hapoh ka Jylla.
Kine ki seng kila dawa ia ka Sorkar ba ka dei ban kren ia baroh ki kynhun ha kaban lah pynbeit noh ia ki jingiakynad baroh.
Kine ki 10 tylli ki seng ki kynthup ia ka Congress, Aam Aadmi Party, Trinamool Congress, CPI-M, CPI, Forward Bloc, RSP, Shiv Sena (UBT), Janata Dal-United bad ka Nationalist Congress Party.
