Imphal, Jylliew 26: Ki bor pahara kila lap bad pynpra haduh 10 tylli ki bunker jong ki kynhun kaikhlaw kiba don ha kylleng ki jaka jong ka Kangpokpi District bad kila ioh ruh ban kurup haduh 1100 tylli ki tiar siat bad 13,702 ki kuli bapher bapher bala rong tuh na ki jaka buh tiar siat ki Pulit.
Kat kum ka khubor, kine ki tiar siat ki dei kiba la shah tuh naduh ka sngi ba sdang ka thma iapher Jaidbynriew hapdeng ki jaidbynriew Meitei bad ki Kuki, kata naduh ka 3 tarik u Jymmang.
Ka Sorkar Jylla kala aiti ruh ia ka jingjia pynbthei bomb ba jia ha ka 21 tarik Jylliew sha ka National Investigation Agency (NIA) na ka bynta bha ka miat bad ka jingshngain jong ka Ri.
“Lai ngut ki briew kila mynsaw ha kane ka jingpynbthei ia u bomb IED kaba la pyndait ha kawei ka Mahindra Scorpio, bala pynieng hajan kawei ka jingkieng kaba don hapdeng ka Phaugakchau bad Kwakta jong ka surok Tiddim, Bishnapur District” ong ki Heh Sorkar.
Ki khubor bapher bapher kila pyntip ba ki kynhun kaikhlaw, ki runar bad ki paudbhur kila lyte bad knieh ia bun hajar tylli ki tiar siat bad da ki lak ki kuli na ki Police Station bapher bapher naduh ka sngi ba khie ka thma iapher jaidbynriew.
Ka Sorkar hynne ka sngi kala pynjynsut ia ka korphiw sha ka 12 haduh 15 kynta ha ki san tylli ki Valley District, Pherzawl bad Jiribam District, phra haduh shiphew kynta ha Tengnoupal, Churachandpur badKangpokpi districts.
Ym shym la don korphiw shuh ha ki hynriew tylli ki District kiba ki nongshongshnong ba bun paid ki dei ki Naga.
Pule lang ia kane: Kem ki Pulit ka Assam ia 2 ngut ki snar khaii drok, kurup heroin ba shongdor T. 18 klur
