Guwahati, Jylliew 26 : Ki Pulit ka Assam kila kem ia arngut ki briew na Manipur ha ka sngi u Blei ha Guwahati bad markhap ka Kamrup District, kiba khaii droks bad ioh kurup ruh ia u droks ba shongdor haduh T. 18 klur.
Ki Heh Pulit ki pyntip ba halor ka jingioh khubor ba thikna, ki Pulit Special Task Force lem bad ki Pulit ka Kamrup kila kthong ia arngut ki suba nongkhaii droks kiba don hapoh ka kali bad kila ioh ban kem ia ki.
U Deputy Inspector General ka STF Partha Sarathi Mahamta ula ong ba hadien ka jingioh khubor, ki Pulit kila ap shrip ia kine ki briew ba wan kit ia u droks na Manipur bad iaid lyngba ka Assam.
“Ha ka step sngi u Blei, ngi la ioh khubor ia ka jingdon ka kali remdir kaba kit ia u droks. Mar mar ngi la buddien ia kane ka kali bad ngi la behthong ia ka. Ha kane ka jingiabeh thong, u nongniah kane ka kali ula leit hap sha ka jaka riat ba 100 phut eiei ha Powa Makkah kaba don ha Hajo” ong u Mahanta.
Ki Pulit kila kem ia kine ki arngut kiba dei na Manipur bad ha ka jingtalasi ia ka kali kaba la kylla khongpong, kila ioh ban kurup ia u drok.
