Imphal, Jymmang 07 : Ka sorkar Jylla kala pynjynsur ia ki kynta jong ka korphiw ha Churachandpur hynne ka sngi U Blei, kaba la sakhi ia ka jingmih jong ki paidbah ban iathied marbam, dawai bad kiwei kiwei ki mar ba donkam.
Ki shipai Indian Army bad ki Assam Rifles kila pynlong ia ka jingiaid flag march ha ka sor hadien bala pynjari ia ka korphiw kaba kut ha ka por 10 baje mynstep.
Kat kum ki khubor, palat 10000 ngut ki shipai Indian Army bad ki para military kila don mynta ha Manipur.
Ka khubor ka ong ba 120-125 column ki shipai kila don ha kylleng ki jaka jong kane ka Jylla kaba don hapdeng ka jingiaum snam na ka jingiakynad pher jaidbynriew.
Ka korphiw kala pyrrkhing ia ka leit ka wan jong ki paidbah bad ban mih nala iing ha kaba la pynjynsur noh haduh lai kynta kata naduh 7 baje mynstep ha Churachandpur District hynne ka step Sngi U Blei, tang ban ailad ia ki paidbah ba kin iathied ia ki marbam, dawai bad kiwei kiwei.
“Ki shipai kila pynkhlain ruh ia ka jingpeitngor na suin lyngba ki AUV (unmanned aerial vehicles) bad ka jingiaid pahara da ki helicopter ha Imphal” ong u nongaiktien ki shipai.
Ia ka korphiw la pynjari naduh ka 3 tarik Jymmang hadien ka jingkulmar kaba mih hapdeng ki riewlum bad ki dkhot jong ka jaidbynriew Meitei, kaba la pynphet wir ia palat 13000 ngut ki briew bad shim ia ka jingim haduh 54 ngut.
Kat kum ka khubor, kane ka jingkulmar kala mih hadien ka jingpynlong ia ka rally “Tribal Solidarity March” ha ki 10 tylli ki District ka Jylla ban pyrshah ia ka jingdawa jong ka Jaidbynriew Meitei ban ai jingithuh kum ki Scheduled Tribe ka Jylla.
