Imphal, Iaiong 28 :U district magistrate (DM) ka Churachandpur u la pynjari da ki kyndon 144 CrPC hapoh Churachandpur district hashwa ka jingwan jurip da u Myntri Rangbah (CM) ka jylla u Biren Singh.
La ioh jingtip lyngba u Superintendent of Police, Churachandpur ba ka lah ban don ka jingpynthut ia ka suk ka sain jong ki nongshong shnong bad kaba buh jingma ruh ia ki riew paidbah nongleit nongwan bad ki jingdon jingem ha ki bynta jong ka Churachandpur District.Kumta ruh ka long kaba donkam ban shim mardor ia ki sienjam ban khanglad na kiba kum kine ki jingjia.
Katkum kitei ki kyndon la khang pyrshah ia ka jingialum briew kaba palat ia ka san ngut, ka jingrah ia ki kynja tiar pynmynsaw kum ki dieng, ki maw, tiar siat ne kino kino ki kynja tiar kiba lah ban wanrah ka jingmynsaw ha ki bynta jong ka Churachandpur district khamtam ha ki bynta jong ka New Lanka.
Ha kawei pat ka bynta,ki katto katne ki kynhun ki riew paidbah bad ki riew runar ki la pynjulor noh ia ka jaka kilan met (Gym) kaba dang shu tei thymmai hapoh PT Sports Complex, New Lamka ia kaba dei ban wan plie da u CM ka Manipur mynta ka 28/04/2023 bad pynjulor ruh ia ka jaka ba thmu ban pynlong ia ka jingialang paidbah ha Sadhbhav Mandap.
Watla katta katei ka hukum kam shym la kynthup ia ki tnat jong ka sorkar ki ba don bynta ban tehlakam ia ka jinglong jingman bad ka suk ka sain hapdeng ki riew paidbah ki ba wan iashim bynta ha ka jingplie ia katei ka Open Gym ha PT Sports Complex nalor ka jingialang paidbah ha Sadbhavna Mandap, New Lamka ha Churachandpur.
Na ka liang ka seng Indigenous Tribal Leaders’ Form (ITLF) ka la khot pynlong ia ka jingkhang dam kaba pura hapoh Churachandpur district naduh ka por 8 baje mynstep haduh 4 baje janmiet jong ka 28/04/2023 ban pynpaw pyrshah ia ka jingsorbe jaka jong ka sorkar bad halor ka jingshah pynpra ki iingmane, bad ba ka lah ban don ruh ka jingpynkhreh ialum paidbah lyngba ka jingpyndonkam ia ki social media ka ba lah ban pynmih ia ka jingiakynad bad ki kam pynkhein ain hapoh Churachandpur district.
Kumta ruh na ka liang ki bor sorkar ki la kyntu ia ki tnat treikam kiba pyniaid ia ki kor internet ba kin pynsangeh mardor hapoh Churachandpur district tad haduh ba ka jinglong jingman kan long da kumwei pat.
Katei ka jaka kilan met hapoh PT Sports Complex ia kasba u CM N Biren Singh u dei ban wan plie mynta ka sngi ka la julor noh marshiteng na ka jingshah thang ha ki katto katne ki riew runar ki bym lah ban ithuh.Hynrei, na ka liang ki bor pulit ka distirct kila lah ban tuklar mardor bad tem ia ki paidbah ha kane ka jaka.
Na ka liang u CM Biren Singh u la kynnoh ia ka jingdonkti ki kynhun lehnoh kiba treikam napoh Myanmar ban pynshit halor kine ki jingiakhih pyrshah.
