Guwahati, Iaiong 28: Ka tnat Central Bureau of Investigation (CBI), hadien ka jingtrei borbah ka la ioh ban kem noh ia uwei u runar uba la shah kynnoh donkti ha kaba siat pyniap ia ki rhino na Dimapur ha Nagaland, kata hadien ba u la don hapdeng ka jingphet rieh naduh ka snem 2012.
Ia une u briew uba la shah kynnoh donkti la tip kyrteng kum u Raidang Engti, uba la jah rngai noh ha kaba iadei bad ka case siat rhino ba la rejistar ha u snem 2012.U Engti uba dei u nongshong shnong ka Dimapur u la shah kem noh na ka shnong Lhomithi kaba hapoh ka sorbah Dimapur ka Nagaland.
Ka CBI hadien ka jingkyrpad na ka liang ka sorkar Assam bad hadien ka jingioh pdiang ia ka jingpyntip na ka sorkar pdeng, ka la shimti ia ka jingtohkit hadien ba la rejistar case hapoh Rongmongwe police station hapoh Karbi Anglong district.
Ia ka jingujor la ujor pyrshah naduh ka 1 tarik u Naitung 2012, kata hadien ba uwei u rhino u la shah pyniap noh ha ki nongsiat mrad ki bym lah ban tip ha kaba la khet noh ruh ia ka reng jong u.Ia ka met jong une u rhino la shu ieh kumto ha kawei ka jaka ba la tip kum ka Long Koi Tisso Gaon.
“Ha ka jingtohkit la shem ba hadien ba la pyniap ia utei u rhino, uwei pat uba la shah kynnoh donkti u la die noh ia ka reng jong utei u rhino sha utei u briew uba la shah kem noh ha Dimapur.Ka jingiadon bynta jong une u briew uba la shah kynnoh donkti ka la wan long hadien ba u briew uba donkti ha kaba siat iap ia utei u rhino ula pyniaid iew ia ka reng jong u ha ka dor kaba heh,” ong kaiphot.
Nalor kata la ong ruh ba hadien ka jingtohkit, la ujor pyrshah ha ka 31 tarik u Lber 2018 pyrshah ia ki san ngut kiwei pat.Ka jingtohkit ka la plielad ha kaba iadei bad ka jingdie ia ki reng rhino khnang ban ioh kem ia utei u briew uba la shah kynnoh donkti uba ka kyrteng jong u ka la mih paw ha ka por ka jingpynlong ia ka jingtohkit halor ka jingthied ia katei ka reng jong utei u rhino.
