Imphal, K’lyngkot 22 : U President bad MLA ka Manipur Pradesh Congress Committee (MPCC) K Meghachandra Singh ula ong ba u Myntri Rangbah ka Jylla N Biren Singh ula sei madan ba ka sorkar pdeng kala pyntreikam ia ka Article 355 jong ka Riti Synshar ka Ri hapoh Manipur.
Kane ka Article jong ka Riti Synshar ka aibor ia ka Sorkar Pdeng ban iada ia ka Jylla na ki kam thombor kiba wan nabar bad kiba hapoh ka Jylla ruh kumjuh.
U Meghachandra, uba jop na Wangkhem seat ha Thoubal district, ula batai ia ki jingiakren jong ka All Party Meeting bala khlieh da u Myntri Rangbah hapoh ka Office Complex ba long hynnin ka miet sngi U Blei.
“Ha ka jingialangba mynta ka sngi, u Myntri Rangbah ula iathuh baka Article 355 kala treikam ha Manipur, kaba la pynkyndit ruh halor ka nongrim ba kane ka kam kala iaid sopsop khlem ka jingtip mano mano ruh” ong u Nongialam ka Congress haba iakren bad ki nongthoh khubor hadien ba mih na ka jingialang.
“Ka long kaba sngewsih ba u Myntri Rangbah u dang pyntip mynta ka sngi ia kane ka kam” ong u Meghachandra haba bynrap ba kane kala pyni ia ka jingkheinsting jong ka Sorkar Pdeng bad ka Sorkar Jylla.
La ioh jingtip ba ki nongmihkhmat ka JD(U), AAP, CPI (M), Forward Bloc, JD(U), NCP, RSP, Shiv Sena (UBT) bad AITC- kila iashimbynta ha kane ka jingialang.
