Imphal, Nohprah 06 : Ka jongshongsyier kala synshar biang ha Tengnoupal District ka Manipur hadien ba 13 ngut ki briew kila shah pyniap klet, kaba pynlong ruh ia ki nongshongshnong ka Leithao ban phet noh nala ki jong ki Iing hynnin ka sngi Ba-ar ba sheptieng ioh nang jur ki kam umsnam.
Ka shnong Leithao ka dei kaba jai jai tam naduh ba khie ka kam iaumsnam ha Jylla naduh ka 3 tarik Jymmang namar kane, ym shym la don satia ki bor pahara ki ban pahara ha kane ka Shnong. Ka jaka ba don eh ba don ki bor pahara ka jngai kumba 10 Km ha Saibol.
“Hadien ba ki bor pahara kila mih noh ha ka miet sngi Nyngkong, baroh ki nongshongshnong kila phet shnong. Kila iasah mynta ha ki iing jong ki bahaiing hasem ha shnong Chehlep bad Phalbung, kaba dang hap hi ha Tengnoupal District. Ngi kyrpad jur ia kibor pahara ba kin wan pahara ia ka shnong jong ki. Ki kynhun kaikhlaw kin sa wan biang ban thombor ia ngi” ong u Jamkhogin Lupho, Secretary ka shnong Leithao.
Kane ka Shnong kaba hap hapoh u pud u sam ka Machi Police Station, ka don kumba 9 tylli ki iing bad kumba 70 ngut ki nongshongshnong.
Haduh mynta, ki bor pulit bad ki shipai kim shym la pynthikna satia ia ki 13 ngut kiba shah pyniap ba ki dei na ka jaidbynriew aiu.
