Imphal, Jymmang 28: Ka BJP-Manipur ha ka sngi Saitjain kala phah ia ka dorkhas sha u Myntri Rangbah Duh ka Ri Narendra Modi ba kyrpad ban phaikhmat lem sha ka jinglong jinglong ka suk ka sain hapoh Manipur.
“Kane ka jingkulmar ba sdang naduh ka 3 tarik Jymmang, ha Churachandpur kala pynbitar ia ki paidbah bad kala nang heh da ka jingiakhih ki paidbah. Wat hapdeng ka jingkhlain ki bor pahara ha kiba bun ki jaka ka Jylla, ki jingia umsnam ki dang iai jia, kaba lam sha ka jingnang pynsyier mynsiem ia kiba bun ki Jaidbynriew ba sah hapoh ka Jylla” ong ka dorkhas.
“Ngi kyrpad ban pynjari pyrrkhong ia ki kyndon ka Suspension of Operation (SOO) khnang ban lah tehlakam ia ki kynhun UGS (underground surrenderee) hapoh ka SOO ( kum ka jingaiti ia ki tiar siat bad kuli, set lang shi jaka ia ki UGS ha ki ktem) bad ruh ban pynsajia ia kito kiba donkti ha ki kam pyntriem” kala ong.
Ka BJP kala ong ruh ba ka party kala smai ban pynneh ia ka jingialong kawei jong ka Jylla Manipur bad kan pyrshah jur ia kino kino ki jingpyrshang ban wanrah ia ka jingiapait iapra.
Kala ong ruh ba ka party ka pyrshah jur ia kano kano ka kam ba iadie bad ka jingphiah ia ka Jylla Manipur.
Ha kajuh ka por ka BJP kala kyntu ia baroh ki jaidbynriew ba kin kiar noh na kino kino ki kam pyntriem.
