Imphal, Naiwieng 15 : Ka Indigenous Tribal Leaders Forum (ITLF) ha ka sngi Balang kala pynlong ia ka rally kaba heh bha ha Churachandpur ban dawa pynurlong noh ia ki jingdawa ba kongsan bad ruh ban pynsngew ia ka jingdawa tohkit da ka CBI ne NIA halor ka jingshah pyniap bad thombor ia palat 22 ngut ki paid Kuki-Zo.
“Pdiang ia ka jingdawa jong ngi ban ai noh la ka jong ka synshar khadar, lym kumta ngin jied ban synshar noh dalade” buh por kane ka kynhun ia ka Sorkar Pdeng.
“Kala iaid hynriew bnai bad ym shym la leh eiei halor ka jingdawa ban phiah noh la ka jong ka synshar khadar n aka Sorkar Manipur. Kumta, lada ka sur jong ngi kam poi shaei shaei hapoh ki khyndiat taiew, ngin buh hi noh dala ka jong ka Sorkar. Kumba long ki Jylla ne Union Territory, ngin buh hi ia ka Sorkar lajong ka ban khmih ia baroh ki kam jong ki jaka ki Kuki-Zo..ngi hap ban leh ia kane namar ka sur jong ngi kam poi shaei shaei ruh” ong u Ginza Vualzong, Nongaiktien ka ITLF.
Kane ka Seng ba hehduh jong ki jaidbynriew Kuki-Zo ha Manipur kala kam ba lada ka Sorkar Pdeng kam mynjur ia kane ka jingdawa ban ai noh la ka jong ka synshar khadar ia ki jaka ki paid riewlum ka Manipur hadien ka thma iapher jaidbynriew ka bym kut shuh, ki kynhun jong ki jaidbynriew Kuki bad Zomi ki long kiba la khreh ban thaw noh iala ka jong ka Sorkar”.
Ki MLA na ka jaidbynriew Kuki-Zomi, kynthup kito kiba dei na ka BJP, ki kynhun kieng atiar ki Kuki-Zomi kiba don hapdeng ka jingsangeh iasiat ba dang don ha ka jingiakren iasuk lem bad kiwei kiwei ki kynhun, kila dawa ba dei ban phiah noh ia ka Jylla Manipur.
Ka Kuki Wimen Organisation for Human Rights, ruh kala pynpaw ia ka jingsngewkhia halor ki jingkynnoh thombor jong ki Pulit Commando ka Manipur ia ki nongshongshnong ba lui lui jong ka shnong Moreh, kaba don ha khappud ka Myanmar.
Ka President ka KWOHR Nganeikim Haokip kala ong ba ka Seng ka sngewsih kthang halor ka jingshah pynshitom bein ki hynniew ngut ki nongshongshnong ka Moreh ha ki Pulit Commando ba dei na ka Jaidbynriew Meitei.
