Guwahati, Jylliew 11: Ka United Naga Council (UNC) ha ka sngi Balang ka la pynbna ban khang dam lut kaba 24 kynta ha kylleng ki jaka ba sah ki Naga ha Manipur hadien ba la lap ïa ki 6 tylli ki met iap jong ki Naga kiba la shah rahbor ha u bnai ba la dep, ha kaba katei ka seng ka la kynnoh ba ïa ki metïap la lap ha ka jinglong ba la ot ïa ki dkhot met.
Ia kane ka jingkhang dam yn pynlong naduh ka por 6 baje mynstep jong ka 11 tarik u Iaiong haduh ka por 6 baje mynstep jong ka 12 tarik u Jylliew kum ka dak jong ka jingpyrshah bad ban dawa ia ka hok na ka bynta ki lanot, la ong ka UNC ha ka kyrwoh.
Da kaba batai ia ki jingshah pyniap kum ka “jingpynkhein kaba khraw ia ka hok longbriew manbriew” bad ka jingeh ia ki bor pahara bad ban ithuh ia ka jinglong jong ki jaitbynriew Naga, ka council ka la ong ba ka jingkyrmen ba ki lanot kin wanphai biang da kaba suk hadien ba la lap ia ki hynriew ngut ki nongshah rahbor, kiba la shah rahbor ha ka 13 tarik u Jymmang. Ka UNC ka la kynnoh ïa ki kaikhlaw jong ka kynhun Kuki National Front-President [KNF(P)] bad ki nongshong shnong jong ka shnong Leilon Vaiphei kiba donkti ha kane ka jingshah rahbor bad ka jingpynïap.
Ka council ka la pynbna ruh ba yn nym pdiang ia ka met iap jong ki 6 ngut kiba la shah pyniap tad haduh ban da pynbeit ia ki jingdawa jong ka da ka sorkar Manipur bad ka sorkar pdeng.
Napdeng ki jingdawa ba kongsan jong ka, ka UNC ka la pan ban pyndam noh ia ka jingiateh Suspension of Operations (SoO) bad ki kynhun kaikhlaw Kuki, ban kem bad pynngat mardor ia kiba donkti ha ka jingrahbor bad jingpyniap briew, bad ban pynbna ia ka KNF(P) kum ka seng lehnoh.
Ka la dawa ruh ban weng noh ia u Nemcha Kipgen, Myntri Rangbah ka Manipur, da kaba kynnoh ba u don ka jingiatyngkhuh namar ba ka don ka jingiadei ha iing ha sem bad ka president ka KNF(P).
Ka council ka la ong ba katei ka jingjia ka la wanrah ia ka jingsngewsih kaba khraw hapdeng ki jaitbynriew Naga bad ka la pynmih ia ka jingsngewkhia kaba jur halor ka jingbymlah jong ka sorkar ban iada ia ki riew paidbah kiba lui lui hapdeng ka jingiakynad hapdeng ki jaitbynriew kiba dang iai bteng ha Manipur.
 ha ka sngi Balang ka la pynbna ban khang dam lut kaba 24 kynta ha kylleng ki jaka ba sah ki Naga ha Manipur hadien ba la lap ïa ki 6 tylli ki met iap jong ki Naga kiba la shah rahbor ha u bnai ba la dep, ha kaba katei ka seng ka la kynnoh ba ïa ki metïap la lap ha ka jinglong ba la ot ïa ki dkhot met.){kind=link}